کوئٹہ میں شہری نے مبینہ طور پر فائرنگ کرکے بیوی اور چار بچوں کو قتل کرکے خودکشی کرلی۔
اے آر وائی نیوز کے مطابق کوئٹہ میں وحدت کالونی کے رہائشی محمد آصف نے مبینہ طور پر فائرنگ کرکے بیوی اور چار بچوں کو قتل کرکے خودکشی کرلی، جاں بحق بچوں میں تین بیٹیاں اور ایک بیٹا شامل ہے۔
متوفی نے خودکشی سے قبل ویڈیو بیان میں دو ہمسایوں سرکاری ملازمین پر گھریلو زندگی میں مداخلت کے الزامات لگائے تھے۔
محمد آصف کے بھتیجے نے بتایا کہ واقعے سے قبل چچا نے فون پر کچھ لوگوں کی جانب سے تنگ کرنے کی شکایت کی اور کہا خود اور بچوں کوختم کررہا ہوں۔
متوفی نے اپنا ویڈیو بیان محلہ کے واٹس ایپ گروپ اور دیگر لوگوں کو بھی بھیجا، جس میں وہ دو ہمسایوں کی جانب سے گھریلو معاملات میں مداخلت اور بے جا تنگ کرنے کے الزامات لگا کر وزیراعلیٰ سے تحفظ کی اپیل کی گئی تھی۔
بھتیجے حاتم نے چچا کی ذہنی صحت کی خرابی سے متعلق دعووں کو مسترد کیا ہے۔
پولیس حکام نے جائے وقوعہ سے شواہد اکٹھے کرکے واقعے کی مختلف پہلوؤں سے تحقیقات شروع کردی ہیں۔
وزیراعلیٰ اور وزیر داخلہ بلوچستان نے واقعے کا نوٹس لے کر پولیس سے 24 گھنٹوں میں محرکات سامنے لاکر رپورٹ پیش کرنے کی ہدایت کی ہے جبکہ نام آنے والے دونوں سرکاری اہلکاروں کو گرفتار کرلیا گیا ہے۔
