رپورٹ : انورخان
کراچی:پاکستان سمیت دنیا بھر میں سگ گزیدگی کا عالمی دن ہر سال اٹھائیس ستمبر کو منایا جاتا ہے، اس موقع پر جناح اسپتال کے شعبہ حادثات کی سربراہ سیمی جمالی کا کہناہے کہ جدید تکینیک اپنا کر سگ گزیدگی کے واقعات پر قابو پایا جاسکتا ہے۔
پاکستان کے سب سے بڑے شہر کراچی میں صرف جناح اسپتال میں رواں سال اگست دو ہزار سولہ تک کتے کے کاٹنے کے 4629کیسز رپورٹ ہوئے جبکہ جناح اسپتال شعبہ حادثات کی سربراہ اور جوائنٹ ایگزیکٹیو ڈائریکٹر ڈاکٹر سیمی جمالی کے مطابق دو ہزار پندرہ میں 6590سب سے زیادہ کیسز رپورٹ ہوئے۔
کتوں کے کاٹنے کے باعث ریبیز نامی مہلک بیماری لاحق ہوجاتی ہے بروقت طبی امداد نہ ملے تو پھر یہ مرض لاعلاج ہوجاتا ہے۔ماہر صحت کے مطابق پاگل کتے کے کاٹنے سے ریبیز انتہائی خطرناک صورتحال اختیار کرجاتا ہے جناح اسپتال میں گذشتہ سال ایسے مریض بھی لائے گئے تھے جو کتوں کے کاٹنے کے باعث انتہائی خطرناک صورتحال کا شکار ہوگئے تھے اور کتوں کے کاٹنے کے باعث بارہ اموات سامنے آئی تھی یہ وہ متاثرہ افراد ہیں جنھوں نے بروقت طبی امداد حاصل نہیں کی تھی۔
کراچی میں جناح پوسٹ میڈیکل سینٹر واحد سب سے بڑا سرکاری اسپتال ہے جہاں پر ایمرجنسی بلڈنگ میں ڈاگ بائٹ کلینک گذشتہ کئی سال سے فعال ہے یہاں آنے والے تمام متاثرہ مریضوں کو بروقت طبی امداد فراہم کرنے کے علاوہ مقررہ ویکسین فراہم کرنے کیلئے مریضوں کو فالواپ کیلئے بلایا جاتا ہے جبکہ ویکسین کی فراہمی بھی مفت ہوتی ہے۔
ریبیز کا علاج انتہائی مہنگا ہونے کے باعث ایسے افراد جو کہ شہر کے مختلف نجی اسپتالوں کا رخ کرتے ہیں ان کو یہ علاج انتہائی مہنگا پڑتا ہے کراچی کے دیگر سرکاری اسپتالوں میں صرف ابتدائی طبی امداد فراہم کی جاتی ہے جہاں تمام ویکسین متاثری مریضوں کو خود خریدنی پڑتی ہے ۔
جناح پوسٹ گریجوئٹ میڈیکل سینٹر شعبہ حادثات کی سربراہ ڈاکٹر سیمی جمالی کہتی ہیں کہ گذشتہ چند روز کے دوران آٹھ سو سے زائد کتوں کو مار کر ان کی تصاویر ذرائع ابلاغ میں جاری کی گئیں یہ عمل غلط ہے اور عالمی سطح پر اینیمل لوور اس پر اعتراض بھی کرتے ہیں۔
انھوں نے کہا کہ کتوں کی افزائش بہت تیزی سے ہوتی ہے اس کیلئے ضروری ہے کہ کتوں کو مارنے کے بجائے ان کو ویکسینیشن کے ذریعے نیوٹرل کرکے ان کی ٹیگنگ بھی کی جائے، اس طرح کتوں کی بہتات اور افزائش پر قابو پایا جاسکتا ہے اور سگ گزیدگی کے چیلنجز سے بھی نمٹا جاسکتا ہے۔
