کنونیئر شپ کے بعد فاروق ستار کی اسمبلی رکنیت کو بھی خطرہ farooq sattar
The news is by your side.

Advertisement

کنونیئر شپ کے بعد فاروق ستار کی اسمبلی رکنیت کو بھی خطرہ

کراچی: ایم کیو ایم پاکستان کی رابطہ کمیٹی نے سربراہ کے خلاف عدالت جانے کا فیصلہ کرلیا، ذرائع کا کہنا ہے کہ ڈاکٹر فاروق ستار کی اسمبلی رکنیت کو بھی عدالت میں چلینج کیا جائے گا۔

ذرائع کے مطابق رابطہ کمیٹی عدالت میں درخواست دائر کرے گی کہ ڈاکٹر فاروق ستار نے دھوکے اور فراڈ سے پارٹی آئین تبدیل کیا لہذا اُن کے خلاف آرٹیکل 62،63 کی دفعات کے تحت مقدمہ چلایا جائے۔

رابطہ کمیٹی کے ذرائع کا یہ بھی کہنا ہے کہ دھوکا اور فراڈ کرنے کے بعد ڈاکٹر فاروق ستار صادق اور امین نہیں رہے، آئین پاکستان کے تحت کوئی بھی جھوٹا اور بے ایمان شخص پارلیمنٹ کا رکن نہیں بن سکتا۔

ذرائع کا کہنا ہے کہ ایم کیو ایم رابطہ کمیٹی (بہادرآباد گروپ) سابق کنونیئر کے خلاف عدالت میں تمام شواہد بھی پیش کرے گا۔

مزید پڑھیں: یہ مائنس ون کے بعد اب مائنس ٹو کر رہے ہیں، فاروق ستار

دوسری جانب ایم کیو ایم پاکستان کی رابطہ کمیٹی کے ممبر فیصل سبزواری نے ذرائع سے چلنے والی خبر کی تردید کرتے ہوئے کہا ہے کہ ’ہم بہادرآباد میں ڈاکٹر فاروق ستار کی آمد کے منتظر تھے اور رہیں گے، کوئی بھی رکن اُن کے خلاف منفی سوچ نہیں رکھتا‘۔

واضح رہے کہ ایم کیو ایم پاکستان میں گزشتہ کئی دنوں سے رہنماؤں کے درمیان کشیدگی جاری ہے، جس کے بعد متحدہ کے واضح طور پر دو دھڑے سامنے آگئے ایک دھڑے (بہادرآباد) کی قیادت ڈاکٹر خالد مقبول صدیقی جبکہ دوسرے (پی آئی بی) کی سبراہی ڈاکٹر فاروق ستار کررہے ہیں۔

سینیٹ امیدواران کی نامزدگی سے شروع ہونے والے جھگڑے نے اس قدر شدت اختیار کی کہ دو روز قبل رابطہ کمیٹی نے فاروق ستار کو کنونیئر کے عہدے سے برطرف کرتے ہوئے کارکن بنادیا اور انہیں دعوت دی کہ عام کارکن کی طرح ایم کیو ایم میں کام کریں۔

یہ بھی پڑھیں: فاروق ستار پارٹی کا نام اور انتخابی نشان استعمال نہیں کرسکتے، فروغ نسیم

اسے بھی پڑھیں: الیکشن کمیشن کا انٹرا پارٹی انتخابات کرانے کا موقف جانب دارانہ ہے: عامر خان

دوسری جانب اتوار کے روز ہی ڈاکٹر فاروق ستار نے رابطہ کمیٹی کو غیر آئینی قرار دیتے ہوئے تمام ممبران کو عہدے سے ہٹا کر کمیٹی ختم کرنے اور 17 فروری کو انٹر پارٹی انتخابات کا اعلان کیا۔

گزشتہ روز نجی ٹیلی ویژن کے پروگرام میں گفتگو کرتے ہوئے ڈاکٹر فاروق ستار کا کہنا تھا کہ ایم کیو ایم میں مائنس ٹو کے فارمولے پر عمل کیا جارہا ہے جس کے تحت سربراہی پرویز مشرف کو دی جائے گی۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں