ریاض: سعودی عرب، کویت، اردن میں طوفانی بارشوں اور سیلاب نے تباہی مچادی جس کے باعث درجنوں افراد جاں بحق ہوگئے اور نظام زندگی مفلوج ہوکر رہ گیا ہے۔
تفصیلات کے مطابق سعودی عرب میں شدید بارشوں کے باعث تیس افراد جان سے گئے اور نظام زندگی مفلوج ہے، دارالحکومت ریاض اور جدہ میں طوفانی بارشوں سے سیلابی پانی گھروں اور عمارتوں میں داخل ہوگیا۔
غیر ملکی خبر رساں ادارے کے مطابق سیکڑوں گاڑیاں سیلابی ریلے میں بہہ گئیں۔
دوسری جانب کویت میں شدید بارشوں سے نظام زندگی متاثر ہوا، کئی گھر اور نشیبی علاقے زیر آب آگئے۔
ذرائع کے مطابق شدید بارشوں کے باعث ایک شخص ہلاک ہوگیا۔
اردن میں سیلاب کے باعث مختلف حادثات میں بارہ افراد لقمہ اجل بن گئے، اردن میں دو ہفتوں سے جاری بارشوں سے درجنوں افراد لاپتہ ہوگئے ہیں۔
سعودی عرب :شدید بارشیں، مختلف حادثات میں بچوں سمیت12 افراد ہلاک
خیال رہے کہ نومبر 2015 میں سعودی عرب میں شدید بارشوں سے مختلف حادثات و واقعات میں بچوں سمیت بارہ افراد ہلاک اور متعدد زخمی ہوگئے تھے۔
واضح رہے کہ مختلف شہروں میں بارشوں نے تباہی مچا دی تھی، کئی افراد سیلابی پانی میں بہہ کر جاں بحق ہوئے جبکہ تین افراد کرنٹ لگنے سے جان سے ہاتھ دھو بیٹھے تھے۔
علاوہ ازیں 6 بچے صوبہ یانگو میں اور جدہ کے مضافات میں ژالہ باری سے ہلاک ہوئے تھے۔
