کراچی: صوبہ سندھ کے دارالحکومت کراچی میں علیٰ الصبح ہونے والی بوندا باندی نے سردی کی شدت میں اضافہ کردیا۔ محکمہ موسمیات کے مطابق رواں ہفتے سردی کی شدت میں مزید اضافہ ہوگا۔
تفصیلات کے مطابق محکمہ موسمیات کی پیشن گوئی کے عین مطابق آج علیٰ الصبح شہر قائد میں موسم سرما کی پہلی بارش ہوگئی جس سے سردی کی شدت میں اضافہ ہوگیا۔
کراچی کے علاقوں صدر، ڈیفنس، کلفٹن، شارع فیصل اور ملیر میں ہلکی بارش نے ٹریفک کا نظام بھی درہم برہم کردیا۔
بارش کے بعد کراچی میں ٹھنڈی ہوائیں چلنے لگیں جبکہ محکمہ موسمیات نے رات تک پارہ 6 سے 8 ڈگری تک گرنے کی پیش گوئی بھی کردی۔
محکمہ موسمیات کا یہ بھی کہنا ہے کہ کراچی میں رواں ہفتے کے دوران سردی کی شدت میں مزید اضافہ ہوگا۔
یاد رہے کہ کراچی کے علاوہ ملک کے بھر کے مختلف علاقوں میں بارشوں اور برف باری کا سلسلہ گزشتہ 2 روز سے جاری ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
