لاہور سمیت پنجاب کے مختلف شہروں میں موسلادھار بارش کے ساتھ ژالہ باری کا سلسلہ شروع ہوگیا، جس کے بعد پروازوں کے رخ موڑ دیے گئے۔
لاہور ،پتوکی شہر اور گردونواح میں تیز ہواؤں کے ساتھ بارش کے بعد موسم خوشگوار ہوگیا، تاہم تیز ہواؤں کے باعث حفاظتی انتظامات کے تحت مختلف بین الاقوامی پروازیں اسلام آباد اور ملتان ایئرپورٹ روانہ کردی گئیں۔
ایئر پورٹ ذرائع کا کہنا ہے کہ ٹورنٹوسے آنے والی پرواز پی کے798کو اسلام آباد ایئر پورٹ بھیج دیا گیا جبکہ مدینہ سے لاہور آنے والی پرواز کو ملتان ایئرپورٹ اتارنے کی ہدایات دی گئی ہیں۔
پنجاب میں اچھرہ، فیروز پور روڈ ،گلبرگ، تاج پورہ ،کینال روڈ ،باٹا پور، ڈیفنس، ماڈل ٹاؤن،کوٹ لکھپت ،جیل روڈ، نشتر ٹاؤن، پانی والا تالاب ،اندرون لاہور میں تیز بارش کا سلسلہ جاری ہے جس کے بعد شہر کا درجہ حرارت 12 ڈگری سینٹی گریڈ تک گر گیا۔
محکمہ موسمیات کی مزید 3روز تک بارش پیشگوئی کی ہے جبکہ موسلادھار بارشوں کے پیش نظر پی ڈی ایم اے نے الرٹ جاری کر دیا ہے۔
محکمہ موسمیات کے مطابق سترہ اکتوبر تک چاروں صوبوں اور شمالی علاقہ جات کے بیشتر حصوں میں گرج چمک کے ساتھ تیز بارشیں متوقع ہیں۔ اس دوران مری، گلیات، چترال، گلگت بلتستان اور مانسہرہ میں لینڈ سلائیڈنگ کا خطرہ ظاہر کیا گیا ہے۔
اس کے علاوہ پندرہ اور سولہ اکتوبر کے دوران بارشوں سے راولپنڈی، لاہور اور گوجرانوالہ میں اربن فلڈنگ کا خدشہ بھی ظاہر کیا گیا ہے۔
