The news is by your side.

Advertisement

ملک کے مختلف شہروں میں بارشیں، کراچی میں بھی برسات کا امکان

چاغی / پنجگور/ کراچی : دالبندین، نوکنڈی، ماشکیل، تفتان میں دوسرے روز بھی بارش کے باعث ندی، نالوں میں طغیانی ہوگئی، ماشکیل کا زمینی رابطہ منقطع ہوگیا، پاک ایران شاہراہ بھی بند کردی گئی، کراچی میں آج بارش کا امکان ہے۔

تفصیلات کے مطابق ملک بھر کے بیشتر شہروں میں موسلادھار بارش کے باعث نشیبی علاقے زیر آب آگئے، چاغی کے بیشتر علاقوں دالبندین، نوکنڈی، ماشکیل، تفتان میں دوسرے روز بھی ابر کرم ٹوٹ کر برسا۔

جس کے باعث ندی، نالوں میں پانی کی رفتار میں اضافہ ہوا، ماشکیل کا زمینی رابطہ منقطع ہوگیا، پاک ایران شاہراہ پر ہیوی ٹریفک کوروک دیا گیا۔

بارش کی وجہ سے پاک ایران ریلوے لائن اور آر سی ڈی شاہراہ بھی متاثر ہوئی، شدید بارش کے باعث نشیبی علاقے زیر آب آگئے کچے مکانات کو خطرہ لاحق ہوگیا۔

ضلعی انتظامیہ نے حالات کو قابو کرنے کیلئے ایمرجنسی کنٹرول روم قائم کردیا، امدادی کاموں کیلئے لیویز فورس متاثرہ علاقوں کی جانب روانہ کردی گئی۔

اس کے علاوہ پنجگور میں موسلادھار بارش کے باعث نشیبی علاقے زیر آب آگئے، ندی نالوں میں طغیانی کے باعث کئی علاقوں کا زمینی رابطہ منقطع ہوگیا، ضلعی انتظامیہ کی جانب سے متاثرہ شہریوں کیلئے رابطہ سیل قائم کیا گیا ہے، ڈپٹی کمشنر پنجگور نے بارشوں کے پیش نظرلوگوں کو سفر کرنے سے گریز کی ہدایت کی ہے۔

کراچی :

دریں اثناء محکمہ موسمیات کے مطابق شہر قائد میں آج مطلع جزوی ابرآلود رہنے اوربارش کا امکان ہے جس کے باعث سردی کی شدت میں اضافہ ہوجائے گا۔

کراچی میں سائیبیرین ہواؤں کا راج ہے۔ شہر میں25 سے 35 کلومیٹر فی گھنٹہ کی رفتار سے شمال مشرقی ہوائیں چل رہی ہیں۔ یخ بستہ ہواؤں کے باعث سرد موسم کی شدت میں اضافہ ہوگیا۔ آج شہر کا کم سے کم درجہ حرارت 14 ڈگری سینٹی گریڈ ریکارڈ کیا گیا۔

محکمہ موسمیات کا کہنا ہے کہ آج کراچی کا مطلع جزوی ابر آلود رہنے اور بارش کا امکان ہے، بارش کا سلسلہ دوپہر میں شروع ہونے کی توقع ہے اور رات گئے تک جاری رہ سکتا ہے۔

fb-share-icon0
Tweet 20

Comments

comments

یہ بھی پڑھیں