کراچی: چیئرمین پی سی بی رمیز راجہ نے آج بزنس کمیونٹی سے اہم ملاقات کے لیے پہلے دورہ کراچی پہنچے ہیں، جس میں ڈومیسٹک کرکٹ اسٹرکچر مضبوط بنانے سمیت دیگر معاملات زیر بحث آئیں گے۔
تفصیلات کے مطابق چیئرمین پاکستان کرکٹ بورڈ نے آج کراچی میں معروف کاروباری شخصیت عقیل کریم ڈھیڈی سے ملاقات کی، چیئرمین رمیز راجہ نے کہا میں عقیل ڈھیڈی بھائی کا بہت شکریہ ادا کرتا ہوں، ان کے جیسے لوگوں کی ہمیں ضرورت ہے۔
رمیز راجہ کا کہنا تھا کہ ہم کرکٹ اکانومی کو بہتر بنانا چاہتے ہیں، عقیل کریم نے وعدہ کیا ہے یہ ہمارے ساتھ کھڑے ہوں گے، ہم نے انھیں بتایا کہ کس طرح یہ ہماری مدد کر سکتے ہیں، اور آگے چل کر ہم عقیل بھائی کو 100 فی صد انوالو کریں گے۔
چئیرمین پی سی بی رمیز راجہ صاحب کراچی پہنچ گئے جہاں پر وہ پی سی بی کو زیادہ سے زیادہ فائدہ پہنچانے کے حوالے سے تاجر برادری سے ملاقات کرینگے تاکہ زیادہ سپانسر شپ مل سکے….@iramizraja #RamizRaja pic.twitter.com/bwa0SbF5aS
— Qadir Khawaja (@iamqadirkhawaja) October 4, 2021
عقیل کریم ڈھیڈی نے اس موقع پر کہا کہ کرکٹ کی بہتری کے لیے ہمارے پاس آنے پر ہم بھی رمیز راجہ کا شکریہ ادا کرتے ہیں، بڑے عرصے بعد چیئرمین صاحب بزنس کمیونٹی سے ملنے آئے ہیں۔
انھوں نے کہا میں سمجھتا ہوں اب پاکستان کی کرکٹ تبدیل ہو جائے گی، رمیز راجہ ہمارے پاس آئے اب ہم ان کے پاس جائیں گے، اس سلسلے میں بہت سارا کام ہوگا، اور وہ کام آج سے شروع ہوں گے۔
