لاہور: پاکستان کرکٹ بورڈ کے چیئرمین رمیز راجہ ٹیم کی کارکردگی سے خوشی سے نہال ہیں۔
تفصیلات کے مطابق اپنے بیان میں چیئرمین پی سی بی رمیز راجہ نے قومی کرکٹ ٹیم کی حالیہ کارکردگی پر خوشی کا اظہار کرتے ہوئے کہا کہ بنگلہ دیش کے خلاف پاکستان بہت اچھا کھیلا، کرکٹ ٹیم کا جادو اور کمال چل رہا ہے امید ہے جیت کا تسلسل آئندہ سیریزمیں بھی برقرار رہے گا۔
رمیز راجہ نے اس کے ساتھ ہی کہا کہ آئندہ ہفتے میں بتائیں گےکہ مزید کیا کرنے جا رہے ہیں؟۔
واضح رہے کہ گذشتہ روز پاکستان نے بنگلا دیش کو بارش سے متاثرہ ڈھاکا ٹیسٹ میں ایک اننگز اور 8 رنز سے شکست دیکر کلین سوئپ کیا تھا، اس سے قبل قومی ٹیم نے ٹی ٹوئنٹی سیریز میں بھی بنگال ٹائیگرز کو آؤٹ کلاس کیا تھا۔
یہی نہیں پاکستان کرکٹ ٹیم نے ٹی ٹوئنٹی ورلڈکپ میں ناقابل یقین کارکردگی کا مظاہرہ کرتے ہوئے سیمی فائنل تک رسائی حاصل کی تھی۔
قومی ٹیم نے کم وبیش دو ماہ بیرون ملک گزارے، آج قومی ٹیم وطن واپس پہنچے گی۔