پشاور : وزیراعلیٰ کے پی محمود خان نے کہا ہے کہ ماہ رمضان میں خودساختہ مہنگائی اور ذخیرہ اندوزی کسی صورت برداشت نہیں کی جائے گی۔
یہ بات انہوں نے رمضان المبارک سے متعلق اجلاس کی صدارت کرتے ہوئے اپنے خطاب میں کہی، اجلاس میں عوام کی سہولت کیلئے رمضان اسٹریٹجی کی منظوری دی گئی۔
ماہ رمضان میں عوام کو اشیائے ضروریہ کی بلاتعطل فراہمی کیلئے اعلیٰ سطح کمیٹی تشکیل دینے کی منظوری بھی دی گئی مذکورہ کمیٹی میں سیکرٹری داخلہ، سیکرٹری خوراک اورآئی جی پولیس شامل ہیں۔
اجلاس میں فیصلہ کیا گیا کہ رمضان المبارک میں صوبے میں 83سستے بازار اور52کسان مارکیٹس قائم کی جائیں گی۔ اس کے علاوہ ماہ رمضان پلان پر عمل کی نگرانی کے لئے محکمہ داخلہ میں کنٹرول روم کے قیام کا فیصلہ بھی کیا گیا۔
اجلاس سے خطاب کرتے ہوئے وزیراعلیٰ کے پی محمود خان نے کہا کہ تمام ضلعی انتظامیہ رمضان اسٹریٹجی پرمن و عن عمل یقینی بنائیں، خودساختہ مہنگائی اورذخیرہ اندوزی کسی صورت برداشت نہیں کی جائے گی۔
ان کا مزید کہنا تھا کہ عوام کو اشیائے ضروریات کی کمی کو پورا کرنے کیلئے 11اپریل تک سستے بازاروں کے قیام کا عمل مکمل کیا جائے۔
