لاہور: صوبہ پنجاب کے دارالحکومت لاہور میں شاہی قلعے کے باہر نصب سکھ سلطنت کے پہلے مہاراجہ رنجیت سنگھ کا مجسمہ گرا دیا گیا، پولیس نے ملزم کو گرفتار کرلیا۔
تفصیلات کے مطابق شاہی قلعے کے باہر نصب رنجیت سنگھ کا مجسمہ گرا دیا گیا، مجسمے کو علی الصبح کچھ افراد نے گرایا جن میں سے ایک شخص کو بعد ازاں گرفتار کرلیا گیا۔
سوشل میڈیا پر گردش کرتی ویڈیوز میں دیکھا جاسکتا ہے کہ ایک باریش شخص گھوڑے پر سوار رنجیت سنگھ کے مجسمے کو گرا رہا ہے جبکہ اس موقع پر کچھ لوگوں نے اسے پکڑ کر روکنے کی بھی کوشش کی۔
سی سی پی او کا کہنا ہے کہ ملزم رضوان نے ہتھوڑے سے مجسمے کو نقصان پہنچایا، ملزم کے خلاف سخت قانونی کارروائی کی جائے گی۔
سی سی پی او نے ایس پی سٹی کو فوری طور پر موقع پر جانے کی بھی ہدایت کی ہے۔
خیال رہے اس سے قبل بہاولپور میں نصب کیے گئے اولمپیئن سمیع اللہ خان کے مجسمے سے ہاکی اور گیند چرائی گئی تھی جس کے ملزم کو بعد ازاں گرفتار کرلیا گیا تھا۔
اولمپیئن سمیع اللہ خان کے مجسمے سے ہاکی اسٹک اور گیند چرانے والا ملزم 48 گھنٹے کے اندر جدید ٹیکنالوجی کے ذریعے گرفتار کرلیا گیا تھا۔ پولیس کے مطابق ملزم نے اعتراف جرم کیا اور اپنے کیے پر شرمندگی ظاہر کی تھی۔
پولیس کا مزید کہنا تھا کہ سمیع اللہ خان پاکستان کے ہیرو ہیں، سرکاری املاک اور یادگاروں کی حفاظت ہمارا فرض ہے۔
