بھارت کے معروف یوٹیوبر رنویر الہٰ آبادیہ کے دونوں یوٹیوب چینل کو ہیکر نے ہیک کرلیا جس کے بعد ہیکر نے ان کی ویڈیوز بھی ڈیلیٹ کردی ہیں۔
بھارتی میڈیا رپورٹ کے مطابق یوٹیوبر رنویر الہٰ آبادیہ کے یوٹیوب چینل پر سائبر حملہ ہوا، ہیکرز نے ان کے دونوں یوٹیوب چینلز کا کنٹرول حاصل کر لیا۔
جب رنویر کا چینل ہیک ہوا تو وہ اس وقت سنگاپور میں تھے، ہیکرز نے ان کے چینلز کے نام تبدیل کرکے ’ایلون مسک‘ اور ’ڈونلڈ ٹرمپ‘ کے لائیو اسٹریمز پر مبنی پرانی ویڈیوز اپ لوڈ کر دیں۔
ہیکر نے پہلے چینلز کے نام تبدیل کیے گئے اس کے بعد ان کے تمام پوڈکاسٹس اور انٹرویوز ڈیلیٹ کر دیے، یوٹیوبر اپنے یوٹیوب چینل پر فٹنس، ڈائٹ اور موٹیویشنل ویڈیوز اپلوڈ کرتے تھے لیکن مشہور ہونے کے بعد وہ مشہور شخصیات کے انٹرویوز کرتے تھے۔
View this post on Instagram
رنویر الہٰ آبادیہ نے چینل ہیک ہونے کے بعد طنزیہ انداز میں انسٹاگرام پر ایک تصویر پوسٹ کی، جس میں وہ سنگاپور میں ایک ویگن برگر کھا رہے تھے، انہوں نے لکھا کہ ’بیئر بائیسپز کے خاتمے کا جشن مناتے ہوئے، ساتھ ہی میری ڈائٹ کا بھی خاتمہ‘۔
تاہم اب بھارتی میڈیا کا کہنا ہے کہ رنویر کے یوٹیوب چینلز ’رنویر الہٰ آبادیہ‘ اور ’بیئر بائیسپس‘ کو ہیک اور ڈیلیٹ کرنے کے بعد مکمل طور پر بحال کر دیا گیا ہے۔
