کراچی : آج رات سیاہ چاند نظر آئے گا، جو پاکستان میں نہیں دیکھائی دے گا جبکہ امریکہ اور کینیڈا کے علاوہ براعظم شمالی امریکہ، جنوبی امریکہ اور دیگر ممالک میں دیکھا جاسکے گا۔
اس سال یکم ستمبر کو ایک نیا چاند واقع ہوا تھا جبکہ آج دوسرے نئے چاند کی پیدائش ہوگی یعنی ’’سیاہ چاند‘‘ نظر آئے گا، جب سیاہ چاند نمودار ہوگا، اس وقت مغربی نصف کرے کے بیشتر ممالک میں سورج غروب ہوچکا ہوگا لیکن مشرقی نصف کرے میں یکم اکتوبر 2016 کا سورج طلوع ہوچکا ہوگا۔
سیاہ چاند مغربی نصف کرہ ارض میں نصف شب 12 بج کر 11 منٹ پر شروع ہوگا، مشرقی نصف کرہ ارض پر رہنے والے اسے نہیں دیکھ سکیں گے۔
پچھلی بار سیاہ چاند مارچ 2014 میں دیکھا گیا تھا۔
سیاہ چاند کیا ہے
سیاہ چاند شمسی مہینے کا محض دوسرا نیا چاند ہوتا ہے ، یا گہری رنگت کا چاند ہوتا ہے، اس کی رنگت اتنی گہری ہوتی ہے کہ وہ بنیادی طور پر نظر ہی نہیں آتا کیونکہ وہ سورج کی روشنی سے منور نہیں ہوتا۔
خیال کیا جاتا ہے کہ سیاہ چاند بدشگونی کی علامت ہے، لیکن یہ مکمل طور پر معمول کا چاند ہوگا۔
ماہرین فلکیات کے مطابق سال میں چار طرح کے موسم ہوتے ہیں، بہار، گرما، خزاں اور سرما اور ہر موسم تین مہینوں پر مشتمل ہوتا ہے، عام طور پر کسی ایک موسم میں تین نئے چاند آتے ہیں لیکن کبھی کبھار ایسا بھی ہوتا ہے کہ تین کے بجائے چار نئے چاند نمودار ہوں۔
اگر کسی موسم میں ایسا ہوتا ہے تو پھر چار میں سے تیسرے نئے چاند کو ’’سیاہ چاند‘‘ کہتے ہیں، اس طرح کا سیاہ چاند اب 21 اگست 2017 میں نظر آئے گا۔