کراچی : قومی اسمبلی سیکریٹریٹ نےایم کیو ایم کے رہنما عبد الرشید گوڈیل کی ملک سے باہرعلاج کے لئے کی جانے والی درخواست مسترد کردی۔
تفصیلات کے مطابق قومی اسمبلی نے متحدہ قومی موومنٹ کے رہنما رشید گوڈیل کی بیرون ملک جا کر علاج کی درخواست کو 1997 میں جاری ہونے والے وزیراعظم کے حکم کے تحت مسترد کردیا۔
گزشتہ ماہ قاتلانہ حملے میں زخمی ہو نے والے عبد الرشید گوڈیل نے بیرونِ ملک علاج کے لئے قومی اسمبلی کو خط لکھا تھا جسے قومی اسمبلی نے مسترد کردیا۔
ذرائع کے مطابق خط میں وزیر اعظم کے دئیے گئے1997 کےآرڈر کا حوالہ بھی دیا گیا جبکہ کئی اراکین اورپا رلیمنٹ کے افسران بیرون ملک علاج کرواچکے ہیں مگر خط میں اس بات کا ذکر موجود نہیں ہے۔
واضح رہے کہ ایم کیو ایم کے رہنما رشید گوڈیل کو گزشتہ ماہ بہادرآباد کے علاقے میں قاتلانہ حملے کے دوران 5 گولیاں لگی تھیں جبکہ اس حملے میں ان کا ڈرائیور ہلاک ہوگیا تھا۔
ایم کیو ایم رہنما کو زخمی حالت میں لیاقت نیشنل ہسپتال منتقل کیا گیا تھا، جہاں ان کو کئی روز تک وینٹی لیٹر پر رکھا گیا۔
