The news is by your side.

Advertisement

پاک فضائیہ کے جانباز پائلٹ آفیسر راشد منہاس کا 49 واں یوم شہادت

کراچی : نشان حیدر کا اعزاز حاصل کرنے والے سب سے کم عمر پاک فضائیہ کے پائلٹ آفیسر راشد منہاس کا 49 واں یوم شہادت آ ج میں منایا جا رہا ہے۔

تفصیلات کے مطابق پاک فضائیہ کے آفیسر پائلٹ راشد منہاس 17 فروری 1951 کو کراچی میں پیدا ہوئے، ان کا تعلق راجپوت گھرانے سے تھا، انہوں نے جامعہ کراچی سے ملٹری ہسٹری اینڈ ایوی ایشن ہسٹری میں ماسٹرز کیا۔

راشد منہاس نے 13 مارچ 1971 کو پاک فضائیہ میں بطور کمیشنڈ جی ڈی پائلٹ شمولیت اختیار کی، وہ ابتدا ہی سے ایوی ایشن کی تاریخ اور ٹیکنالوجی سے متاثر تھے جبکہ ان کو مختلف طیاروں اور جنگی جہازوں کے ماڈلز جمع کرنے کا بھی شوق تھا۔

اگست 1971ء میں راشد منہاس پائلٹ آفیسر بنے، 20اگست1971ء کو جب وہ اپنی پہلی سولو فلائٹ پر روانہ ہو رہے تھے کہ اچانک ان کے انسٹرکٹر مطیع الرحمان نے رن وے پر طیارہ روک دیا اور ان کے ساتھ سوار ہوگئے۔

فلائٹ میں انسٹرکٹر مطیع الرحمان نے جہاز کا رخ دشمن ملک بھارت کی جانب موڑ دیا لیکن راشد منہاس نے وطن پر جان قربان کرتے ہوئےدشمن کی اس سازش کو ناکام بناتے ہوئے جہاز کا رخ زمین کی جانب موڑ دیا اور اس دشمن کے عزائم کو خاک میں ملاتے ہوئے جام شہادت نوش کیا۔

راشد منہاس شہید نے اپنی جان قربان کرکے ملک کے دفاع اور حرمت کی لاج رکھی، ان کی بے مثال قربانی پر انھیں اعلیٰ ترین فوجی اعزاز نشانِ حیدر سے نوازا گیا۔

انھیں اعزاز حاصل ہے کہ وہ شہادت کا رتبہ حاصل کرنے والے اور کم عمری میں نشان حیدر حاصل کرنے والے پاک فضائیہ کے پہلے آفیسر تھے۔

پاکستان میں نشانِ حیدر پانے والے سب سے کم عمر شہید راشد منہاس کراچی کے فوجی قبرستان میں آسودہٗ خاک ہیں جبکہ اٹک میں قائم کامرہ ایئر بیس راشد منہاس شہید کے نام سے منسوب ہیں۔

Comments

یہ بھی پڑھیں