راولپنڈی: پاکستان تحریک انصاف (پی ٹی آئی) کے رہنما مراد سعید کا کہنا ہے کہ اگر ملک کے لیے کھڑا ہونا بغاوت ہے تو ہم سب باغی ہیں، ہم عہد کرتے ہیں شہید ارشد شریف کے قاتلوں کو عبرت کا نشان بنائیں گے۔
اے آر وائی نیوز کے مطابق سابق وفاقی وزیر برائے مواصلات مراد سعید کہا کہ ہمارا بھائی شہید ارشد شریف بھی ایسے ہی عہد لیتا تھا ہم شہید ارشد شریف کے سوالوں کا جواب نہیں دے سکے تو اسے قتل کردیا گیا، ہم آج عہد کرتے ہیں کہ شہید ارشد شریف کے قاتلوں کو عبرت کا نشان بنائیں گے۔
انہوں نے مزید کہا کہ جیسے تم نے ارشد شریف پر زمین تنگ کردی تھی اللہ کا عذاب تم پر نازل ہوگا، انشا اللہ وہ وقت دور نہیں جب ارشد شریف کے قاتلوں کو چھپنے کی جگہ نہیں ملے گی۔
"ملکی خود مختاری، خود داری اور حقیقی آزادی کے لیے جدوجہد کرتے رہیں گے”
مراد سعید نے کہا کہ عمران خان وزیراعظم تھے اور امریکا کو اڈے چاہیے تھے لیکن عمران خان نے ’ایبسلوٹلی ناٹ‘ کا جواب دیا جس کے بعد سازشیں کی گئیں۔
انہوں نے کہا کہ ملک کے عوام اپنے مقبول لیڈر کے ساتھ کھڑے ہوگئے ہیں، سات سے آٹھ ماہ میں انہوں نے عمران خان کو توڑنے کے لیے ہر قسم کا حربہ استعمال کیا۔
مراد سعید نے کہا کہ عمران خان کو راستے سے ہٹانے کے لیے ان پر قاتلانہ حملہ بھی کیا گیا لیکن آج عوام یہ واضح کرتے ہیں کہ عمران خان کو کسی صورت نہیں ہٹایا جاسکتا ہے۔
انہوں نے کہا کہ میرے پاکستانیوں کیا اپنے مستقبل کے لیے کھڑے رہو گے، آج ہم عہد کرتے ہیں ملکی خود مختاری، خود داری اور حقیقی آزادی کے لیے جدوجہد کرتے رہیں گے۔
پی ٹی آئی رہنما نے کہا کہ پاکستان کے خلاف ہر بیرونی اور اندرونی سازشوں کا مل کر مقابلہ کریں گے، عہد کرتے ہیں کہ عمران خان کے ساتھ مل کر ہر قسم کی سازشوں کا مقابلہ کریں گے۔
