راولپنڈی: تھانہ چونترہ کی حدود میں خاتون اور اس کے چودہ ماہ کے بچے کو سفاکانہ طریقے سے قتل کرنے والے ملزم نے گرفتاری دے دی ہے۔
پولیس ذرائع کے مطابق خاتون اور اس کے چودہ ماہ کے بچے کو قتل کرنے والے ملزم واجد علی نے خود کو پولیس کے حوالے کردیا، ملزم نے دو روز قبل تھانہ چونترہ کی حدود میں خاتون اور اس کے ننھے بیٹے کو تشدد کے بعد موت کے گھاٹ اتار دیا تھا۔
پولیس کے مطابق ملزم نے خاتون کو ملنے کیلئے مہوٹہ موہڑہ میں بلایا، خاتون مہوٹہ موہڑہ گئی تو ملزم نے نے خاتون کو زیادتی کا نشانہ بنانے کے بعد اسے بدترین تشدد کا نشانہ بنایا جس کے باعث اس کے کمسن بچہ موقع پر ہی جاں بحق ہوگیا تھا۔
پولیس کا کہنا ہے کہ ملزم واجد علی مہوٹہ موہڑہ کا رہائشی ہے اور فرنیچر کا کام کرتا ہے۔
خاتون کی بے بسی کی تصاویر اور ویڈیو سوشل میڈیا پر وائرل ہونے کے بعد خاتون کو اسپتال منتقل کیا گیا جہاں وہ دوران علاج کل دم توڑ گئی تھی، انسانیت سوز واقعے پر سوشل میڈیا کے زریعے شدید تنقید کی جارہی تھی، صارفین کی جانب سے ملزم کو فوری گرفتار کرنے اور اسے عبرتناک سزا دینے کا مطالبہ زور پکڑتا جارہا تھا۔
راولپنڈی پولیس کی جانب سے ملزم کی گرفتاری کے لئے فیس بک پر بھی پوسٹ شائع کی گئی تھی، جس میں ملزم کی معلومات رکھنے والے شخص کو فوری طور پر مقامی پولیس کو آگاہ کرنے کا کہا گیا تھا۔