راولپنڈی: پاکستان تحریک انصاف (پی ٹی آئی) کی رہنما یاسمین راشد کا کہنا ہے کہ عمران خان یہ جنگ جیت کر رہے گا۔
پی ٹی آئی کے حقیقی آزادی مارچ کے شرکا سے خطاب کرتے ہوئے سابق وزیر صحت یاسمین راشد نے کہا کہ تحریک انصاف کے جلسے میں خواتین کی بڑی تعداد شریک ہیں۔
انہوں نے کہا کہ ملک کو ان چوروں اور لٹیروں کے حوالے نہیں کرسکتے۔
یاسمین راشد نے کہا کہ ہم انشا اللہ عمران خان کے موقف کے ساتھ اسی طرح کھڑے رہیں گے اگر ہم عمران خان کے ساتھ اسی طرح کھڑے نہ رہے تو اس امپورٹڈ حکومت سے ہماری جان نہیں چھوٹ سکتی۔
پی ٹی آئی رہنما نے کہا کہ ہم اپنی آنی والی نسل کو ان لوگوں کے پاس نہیں چھوڑ سکتے اسی لیے یہ جنگ جاری رکھیں گے۔
انہوں نے مزید کہا کہ انشا اللہ عمران خان یہ جنگ جیت کر رہے گا، انہوں نے شرکا سے نعرہ تکبیر اللہ اکبر، پاکستان زندہ باد کے نعرے بھی لگوائے۔
