راولپنڈی: ملک بھر میں لاک ڈاؤن اور شادی بیاہ کی تقریبات پر پابندی کی وجہ سے خواجہ سرا بھی مشکل میں آ گئے ہیں، تاہم راولپنڈی پولیس نے اس سلسلے میں اہم قدم اٹھاتے ہوئے گھروں کی دہلیز پر انھیں راشن فراہم کر دیا۔
اے آر وائی نیوز کے مطابق راولپنڈی پولیس خواجہ سراؤں کو راشن پیکج پہنچانے ان کی دہلیز پر پہنچ گئی، گزشتہ روز آئی جی پنجاب اور سی پی او احسن یونس کی ہدایات پر مستحق خواجہ سراؤں میں راشن تقسیم کیا گیا۔
پولیس کا کہنا تھا کہ اے ایس پی سول لائنز بینش فاطمہ اور پولیس کے دیگر افسران اور جوانوں نے راشن خواجہ سراؤں کے گھروں تک پہنچایا، اے ایس پی بینش فاطمہ نے کہا کہ مشکل کی اس گھڑی میں مستحق افراد تک راشن پہنچانے کا فریضہ انجام دینا باعث فخر ہے۔
پنجاب میں 25 اپریل تک لاک ڈاؤن میں توسیع، نوٹیفکیشن جاری
اس موقع پر خواجہ سراؤں نے کہا کہ لاک ڈاؤن کی وجہ سے شادی بیاہ کی تقریبات پر پابندی کی وجہ سے وہ بھوک اور افلاس کا شکار ہوئے، وہ کئی دن سے گھروں میں بند تھے اور بھوکے بیٹھے تھے، آئی جی پنجاب اور سی پی او راولپنڈی کا شکریہ ادا کرتے ہیں جنھوں نے ہمارا خیال رکھا، اس مشکل وقت میں پولیس کا مثبت چہرہ اور کردار سامنے آیا ہے۔
سی پی او راولپنڈی محمد احسن یونس کا کہنا تھا کہ لاک ڈاؤن کی وجہ سے بے روزگاری کے شکار تمام طبقات کی مدد کے لیے راولپنڈی پولیس ہر وقت تیار ہے، آئی جی پنجاب کے حکم پر اب تک 1700 سے زائد مستحق افراد کو گھر کی دہلیز تک راشن فراہم کیا جا چکا ہے، راولپنڈی پولیس جرائم اور کرونا کے خلاف جنگ کے ساتھ ساتھ شہریوں کی خدمت کا فریضہ بھی انجام دیتی رہے گی۔
