نئی دہلی : بھارت میں تعینات ایرانی سفیر ایراج الٰہی نے کہا ہے کہ ہم بھارت کو تیل کی فراہمی کے لیے تیار ہیں تاہم اس کیلیے امریکہ کی غیر قانونی پابندیوں سے بچنے کی ضروت ہے۔
غیرملکی خبر رساں ادارے کی رپورٹ کے مطابق بھارتی میڈیا سے گفتگو کرتے ہوئے ایرانی سفیر ایراج الٰہی نے کہا کہ ہم نے ہمیشہ بھارت کے ساتھ اپنے اقتصادی تعلقات کو فروغ دینے کے عزم کا اعادہ کیا ہے۔
بھارتی میڈیا کو دیئے گئے ایک خصوصی انٹرویو میں ان کا کہنا تھا کہ ایران نے بھارت کو تیل کی سپلائی دوبارہ شروع کرنے اور اقتصادی تعلقات بڑھانے کے لیے اپنی کوششوں سے آگاہ کیا ہے۔
اقوام متحدہ کی جانب سے ایران کے خلاف عائد پابندیوں کے سوال پر ایرج الٰہی نے کہا کہ یہ ہمارے لیے بڑی رکاوٹ ہے۔ انہوں نے اس بات پر زور دیا کہ دونوں ممالک غیر قانونی امریکی پابندیوں کو پس پشت ڈال کر اس مسئلے کو اپنے قومی مفادات کے مطابق حل کرنے کیلئے راستہ اختیار کریں۔
ایرانی سفیر نے کہا کہ ایران کی آزادی ہندوستان کے لیے بہترین ضمانت ہے، انہوں نے یہ بات زور دے کر کہی کہ ہم بھارت کو تیل بیچنا چاہتے ہیں اور بھارت سے بھی اپنی ضرورت کی مصنوعات خریدنا چاہتے ہیں۔
واضح رہے کہ ایران مئی 2019 تک ہندوستان کو سب سے زیادہ توانائی فراہم کرنے والے ممالک میں سے ایک تھا، جب بھارت نے امریکہ کی طرف سے ثانوی پابندیوں کی دھمکی کے بعد خام تیل کی خریداری روک دی تھی۔
اس قبل بھارت میں ایرانی سفارتخانے کی جانب سے جاری کردہ بیان میں کہا گیا تھا کہ ایران بھارت کو تیل کی فراہمی یقینی بنانے کے لئے اپنی بہترین کوششیں بروئے کار لاتے ہوئے ایسے لچکدار اقدامات کرے گا جس سے دونوں ممالک کے درمیان باہمی تجارت کو فروغ حاصل ہو۔
