لاہور : پیٹرولیم مصنوعات کی قیمتوں میں حالیہ اضافےکو چیلنج کردیا گیا، جس میں استدعا کی گئی کہ قیمتوں میں اضافے کے حالیہ نوٹیفکیشن کو کالعدم قرار دیا جائے۔
تفصیلات کے مطابق لاہور ہائی کورٹ میں پیٹرولیم مصنوعات کی قیمتوں میں حالیہ اضافے کے خلاف درخواست دائر کردی گئی ، اظہر صدیق ایڈووکیٹ نے اس اضافے کو عدالت عالیہ میں چیلنج کیا۔
درخواست گزار نے عدالت کے سامنے موقف اختیار کیا ہے کہ حکومت نے پیٹرول کی قیمت میں 8 روپے اور ڈیزل کی قیمت میں 5 روپے فی لیٹر اضافہ کر کے عوام پر اضافی بوجھ ڈالا ہے۔
درخواست میں کہنا تھا کہ پیٹرولیم مصنوعات کی قیمتوں میں یہ حالیہ اضافہ غیر آئینی اور "عوام دشمن” اقدام ہے۔
درخواست میں حکومت پر الزام عائد کیا گیا ہے کہ وہ عالمی منڈی میں قیمتوں کے رجحان کے مطابق پیٹرولیم کی قیمتیں مقرر نہیں کر رہی، بلکہ عوام سے اضافی وصولیاں کی جا رہی ہیں۔
اظہر صدیق ایڈووکیٹ کا کہنا تھا کہ ملک میں پہلے ہی مہنگائی اور بیروزگاری عروج پر ہے، اس فیصلے سے مہنگائی کا ایک نیا طوفان آئے گا جس سے غریب طبقہ بری طرح متاثر ہوگا۔
عدالت سے استدعا کی گئی ہے کہ پیٹرولیم مصنوعات کی قیمتوں میں اضافے کے حالیہ نوٹیفکیشن کو کالعدم قرار دیا جائے۔
عابد خان اے آروائی نیوز سے وابستہ صحافی ہیں اور عدالتوں سے متعلق رپورٹنگ میں مہارت کے حامل ہیں