واشنگٹن: امریکا میں سردی کا پچاس سال کا ریکارڈ ٹوٹ گیا، مختلف ریاستوں میں حادثات کے باعث 12 افراد ہلاک جبکہ متعدد افراد اسپتالوں میں داخل ہوگئے۔
تفصیلات کے مطابق امریکی ریاستوں میں شدید سردی کی لہر نے معمولات زندگی منجمد کردئیے، ہر طرف برف ہی برف ہے، امریکا کی وسط مغربی ریاستوں سمیت کئی شہروں نے برف کی چادر اوڑھ رکھی ہے۔
غیر ملکی خبر رساں ادارے کا کہنا ہے کہ کئی ریاستوں میں زندگی مفلوج ہے، امریکی محکمہ موسمیات نے شدید سردی کی وجہ ’پولر ورٹیکس‘ کو قرار دیا ہے، محکمہ موسمیات کے مطابق امریکا میں قطب شمالی کی یخ بستہ ہوائیں ٹھنڈ کی شدت میں اضافہ کر رہی ہیں۔
شکاگو میں پارہ منفی 26 تک گرگیا، درجہ حرارت منفی اکیاون تک جانے کا امکان ہے جبکہ شمالی ڈاکوٹا میں درجہ حرارت منفی 37 تک ہوگیا ہے۔ امریکی حکام نے وارننگ جاری ہے کہ دس منٹ باہر کھڑے رہنے سے فراسٹ بائٹ (اعضاء گلنا یا متاثر ہونا) ہوسکتا ہے۔
امریکی انتظامیہ نے منی سوٹا میں درجہ حرارت منفی 31، الینوائے منفی27، وسکانسن منفی 29، مشی گن منفی 24 سمیت 5 ریاستوں میں ایمرجنسی نافذ کرتے ہوئے سیکڑوں پروازیں اور ٹرینیں معطل کردی ہیں۔
آئیووا میں شہریوں کو گھروں سے نکلنے میں دشواری کا سامنا ہے اور لوگوں کو گہرا سانس نہ لینے کم بات چیت کرنےکی ہدایت کی گئی ہے، کئی ریاستوں میں برفانی ہواؤں کے تیز جھکڑ نے زندگی کو جما کر رکھ دیا۔
منی ایپلیس میں سو سال بعد منفی49ڈگری سینٹی گریڈ کی ہوائیں چل پڑیں، نیشنل ویدر سروس نے ہدایت جاری کی ہے کہ بلاضرورت باہر نہ نکلیں اور سانس بھی آہستہ لیں۔
امریکی محکمہ موسمیات کی جانب سے آئندہ دنوں سردی کی شدت میں مزید اضافے کا خدشہ ظاہر کیا جارہا ہے، جس کے باعث ڈھائی کڑور افراد متاثر ہوں گے، امریکی حکام نے بے گھر افراد کو شدید سردی سے بچانے کےلیے متاثرہ شہروں میں شیلٹر ہوم قائم کردئیے ہیں۔
دوسری جانب برطانیہ میں برفانی طوفان نےنظام زندگی مفلوج کردیا ہے جبکہ فرانس اور بیلجیئم سمیت کئی یورپی ممالک نے برف کی سفید چادر اوڑھ لی ہے۔
