امریکی کوسٹ گارڈز کے انجینیئرز نے زیر سمندر جانے والی ٹائٹن آبدوز کا ملبہ اور مبینہ طور پر انسانی باقیات نکال لیں، طبی ماہرین مبینہ انسانی باقیات کا جائزہ لیں گے۔
تفصیلات کے مطابق بحر اوقیانوس کی تہہ سے ٹائٹن آبدوز کا بقیہ ملبہ اور انسانی باقیات نکال لی گئیں، خبر رساں ایجنسی نے بتایا کہ امریکی کوسٹ گارڈز کے انجینیئرز نے ٹائٹینک جہاز کے ملبے کو دیکھنے کے لیے زیر سمندر جانے والی ٹائٹن آبدوز کا ملبہ اور مبینہ طور پر انسانی باقیات نکال لی ہیں۔
سمندر کی تہہ سے ملنے والی ٹائٹن کے بقیہ حصے کو امریکی بندرگاہ منتقل کیا گیا ہے، جہاں طبی ماہرین مبینہ انسانی باقیات کا تجزیہ کریں گے۔
امریکی کوسٹ گارڈ کے مطابق ملبے میں ممکنہ انسانی باقیات کو بھی احتیاط سے الگ کیا گیا ہے اور انہیں تجزیے کے لیے طبی ماہرین کو بھیج دیا گیا ہے۔
امریکی کمپنی اوشین گیٹ کی آبدوز جون میں ٹائٹینک کے مشن کے دوران تباہ ہو گئی تھی، اس آبدوز میں اوشیئن گیٹ کمپنی کے سی ای او، ایک برطانوی ارب پتی مہم جو، ایک فرانسیسی ڈائیور کے علاوہ پاکستانی کاروباری شخصیت شہزادہ داؤد اور ان کے بیٹے سلیمان سوار تھے۔
ٹائٹن آبدوز میں سوار فراد آبدوز کے پھٹنے سے ہلاک ہوگئے تھے۔
یاد رہے رواں سال جون میں امریکی کوسٹ گارڈ نے دعویٰ کیا تھا کہ ٹائٹن آبدوز کے ملبے سے انسانی باقیات ملی ہیں، جس کے بعد اس کو باہر نکالنے کا مشن جاری تھا، رپورٹس کے مطابق آبدوز کے ملبے کو کینیڈا کے سینٹ جانز شہر کی بندرگاہ پر لایا گیا ہے، ملبے میں آبدوز کا لینڈنگ فریم اور پچھلی جانب موجود خول بھی شامل تھا۔
