کوئٹہ: تاریخ میں پہلی بار سرکاری آسامیوں پر ایک ہی روز میں آن لائن ٹیسٹ اور ایک گھنٹے کے اندر تقرری لیٹر کا اجراء کردیا گیا۔
تفصیلات کے مطابق بلوچستان کی تاریخ میں پہلی بار محکمہ خزانہ میں 111 سرکاری آسامیوں پر میرٹ کی بنیاد پر بھرتیاں شروع کر دی گئی ہیں۔
وزیراعلیٰ بلوچستان سرفراز بگٹی نے کہا ہے کہ یہ اقدام میرٹ کی بالادستی اور شفافیت کے اصولوں کو یقینی بنانے کی طرف ایک اہم سنگ میل ہے۔
حکام نے بتایا کہ بھرتیاں پیپرلیس اور آن لائن بنیادوں پر کی جا رہی ہیں، امیدواروں سے آن لائن ٹیسٹ لیا جائے گا تاکہ ان کی قابلیت کی شفاف جانچ کی جا سکے۔ کامیاب امیدواروں کو صرف ایک گھنٹے کے اندر تقرری لیٹر جاری کیا جائے گا۔
وزیراعلیٰ سرفراز بگٹی نے کہا کہ اصلاحاتی نظام کا آغاز محکمہ خزانہ سے کیا گیا ہے اور یہ مرحلہ وار تمام سرکاری نوکریوں پر نافذ کیا جائے گا۔
ان کا کہنا تھا کہ عوام سے کیے گئے وعدے کے مطابق نہ نوکریاں بیچی جائیں گی اور نہ ہی کرپشن یا اقرباپروری برداشت کی جائے گی۔
انہوں نے مزید کہا کہ میرٹ، شفافیت اور عوام سے کیے گئے وعدے ہی ہماری حکمرانی کی بنیاد ہیں، اور اسی وعدے کی تکمیل کے لیے شفافیت کے نظام کو مزید مضبوط بنایا جا رہا ہے۔
یہ اقدام بلوچستان میں سرکاری بھرتیوں میں میرٹ اور شفافیت کے فروغ کے لیے ایک تاریخی پیش رفت ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں