اسلام آباد : جرائم کی شرح میں چار فیصد کمی کے بعد اسلام آباد دنیا کے محفوظ ترین شہروں میں شامل ہوگیا، اسلام آباد نے سڈنی، برلن، ماسکو، لندن، پیرس اور شنگھائی کو مات دے دی۔
تفصیلات کے مطابق ورلڈ کرائم انڈیکس میں وفاقی پولیس کی رینکنگ میں بہتری آئی ہے، اس حوالے سے عالمی ادارے نمبیو کی جانب سے ایک رپورٹ جاری کی گئی ہے۔
مذکورہ رپورٹ دنیا بھر کے374شہروں میں سروے کے بعد جاری کی گئی۔ نمبیو کی رپورٹ کے مطابق اسلام آباد میں کرائم انڈیکس کم ہو کر28.63 پوائنٹس پر پہنچ گیا ہے۔
اسلام آباد نے محفوظ ترین شہر کے حوالے سے سڈنی، برلن، ماسکو، لندن، پیرس اور شنگھائی کو بھی پیچھے چھوڑ دیا۔
گزشتہ سال ورلڈ کرائم انڈیکس میں اسلام آباد232ویں نمبر پر تھا، گزشتہ سال وفاقی دارالحکومت میں جرائم کی شرح 32.88فیصد تھی۔
رپورٹ کے مطابق کراچی 22 درجے بہتری کے بعد 66 ویں نمبر سے 88ویں نمبر پر پہنچ گیا جبکہ لاہور 28 درجے بہتری کے بعد 174ویں نمبر سے 202 پر پہنچ گیا۔
