کراچی : گورنر سندھ کامران خان ٹیسوری نے ترکیہ کے قونصل جنرل کیمل سانگو سے ترکیہ سے آیا ہوا امدادی سامان وصول کیا۔
ترکیہ نے یہ امدادی سامان سیلاب متاثرین کے لئے بھیجا ہے، ترکیہ سے مجموعی طور پر امدادی سامان کے دو بحری جہاز آئیں گے۔
آج آنے والے پہلے بحری جہاز کے ذریعہ 864 ٹن امدادی سامان کراچی پورٹ پہنچا ہے جبکہ دوسرا بحری جہاز4 فروری کو900 ٹن امدادی سامان لے کر آئے گا۔
امدادی سامان میں کمبل، سردیوں کے لئے گرم کپڑے، غذائی اشیاء اور روزمرہ کے استعمال کی چیزیں شامل ہیں، مذکورہ سامان این ڈی ایم اے کے ذریعہ سیلاب متاثرین میں تقسیم کیا جائے گا۔
اس موقع پر گورنر سندھ نے کہا کہ ترکیہ نے ہر مشکل وقت میں پاکستان کی بِھرپور مدد کی ہے، حالیہ سیلاب کے بعد سب سے پہلا امدادی سامان ترکیہ سے ہی آیا تھا۔
کامران خان ٹیسوری کا کہنا تھا کہ پاکستان اور ترکیہ یک جان دوقالب ہیں، پاکستان کے عوام ہر قدرتی آفت کے موقع پر کی جانے والی مدد پر ترکیہ کے مشکور ہیں۔
قونصل جنرل ترکیہ کیمل سانگو نے کہا کہ ترکیہ کے لوگ پاکستان سے بے انتہا محبت کرتے ہیں، پاکستان زندہ باد اور جیوے جیوے پاکستان ترکیہ کے ہر بچے کو ازبر ہے۔
