لندن : بیلجیم کی پولیس نے غیر قانونی طور پر برطانیہ جانے والے 223 افراد کو ٹرک سے بازیاب کرالیا۔
تفصیلات کے مطابق بیلجیم میں 223 تارکین وطن افراد ٹھنڈی اشیاء کو ٹرانسپورٹ کرنے والے ایک فرج ٹرک میں چھپے ہوئے تھے۔
غیر ملکی خبر رساں ادارے کا کہنا تھا کہ بروگے شہر کی استغاثہ کا کہنا تھا کہ اس واقعے میں کوئی جانی نقصان نہیں ہوا اور تمام افراد کو جب ٹرک سے بازیاب کرایا گیا تو ٹرک میں درجہ حرارت دو ڈگری سینٹی گریڈ ریکارڈ کیا گیا۔
غیر ملکی خبر رساں ادارے کا کہنا تھا کہ ٹھنڈے ٹرک میں ان تارکین وطن میں تین خواتین بھی موجود تھیں۔ یہ تارکین وطن بیلجیم سے ٹرک میں چھپ کر سرنگ کے راستے برطانیہ جانا چاہتے تھے۔
واضح رہے کہ 23 اکتوبر کو برطانوی علاقے ایسکس میں ٹرک سے 39 لاشیں ملی تھیں، برطانوی پولیس نے ٹرک ڈرائیور کو گرفتار کرلیا تھا جبکہ ویتنام سے 10 افراد کو غیر قانونی طور پر سرحد پار کروانے میں ملوث ہونے پر گرفتار کیا تھا۔
مزید پڑھیں : شمالی انگلینڈ میں ٹرک سے 39 لاشیں برآمد
ایسکس پولیس کا کہنا تھا کہ ٹرک سے برآمد ہونے والی 38 لاشیں بالغ افراد کی جبکہ ایک نابالغ شخص کی لاش ہے۔
