یوکرین میں پھنسے پاکستانیوں کی واپسی شروع ہوگئی ، پی آئی اے کی خصوی پرواز 232 ہم وطنوں کو لے کر پولینڈ سے پاکستان روانہ ہو گئی ہے۔
روس اور یوکرین میں جنگ شروع ہونے کے بعد سینکڑوں پاکستانی یوکرین میں محصور ہوگئے تھے اور بحران شروع ہوتے ہی حکومت پاکستان ہم وطنوں کی محفوظ واپسی کیلیے متحرک ہوگئی تھی۔
منگل کی شام پی آئی اے کی خصوصی پرواز پولینڈ کے شہر وارسا سے پاکستان واپس روانہ ہوئی ہے، طیارے میں 232 پاکستانی سوار ہیں۔
مذکورہ فلائٹ آج رات ساڑھے گیارہ بجے وفاقی دارالحکومت اسلام آباد پہنچے گی۔
خیال رہے کہ گزشتہ دنوں یوکرین میں پھنسے پاکستانی شہریوں اور طلبا کی واپسی کے لیے آپریشن تیار کیا گیا تھا، سی ای او پی آئی اے ارشد ملک اور یوکرین میں پاکستانی سفیر کے درمیان رابطہ ہوا تھاجس میں یوکرین میں پھنسے پاکستانی شہریوں کی محفوظ مقام پر منتقلی اور وطن واپسی سے متعلق گفتگو کی گئی تھی اور طیارہ آج صبح ہی پولینڈ کیلیے روانہ ہوا تھا۔
ترجمان پی آئی اے عبدللہ خان نے نمائندہ اے آر وائی نیوز کے نمائندے کو بتایا کہ طیارہ وزارت خارجہ کی اجازت پر روانہ کیا گیا ہے، حکومت پاکستان کی ہدایات پر مزید پروازیں بھی آپریٹ کی جائیں گی۔
اس حوالے سے ترجمان دفتر خارجہ کا کہنا ہے کہ یوکرین میں 7 ہزار پاکستانی موجود تھے جن میں 3 ہزار طالب علم اور 4 ہزار شہری شامل تھے، ترجمان کے مطابق زیادہ تر شہری 24 فروری کو سفارتخانے کے کہنے پر یوکرین چھوڑ چکے ہیں۔
دفتر خارجہ نے گزشتہ روز بتایا تھا کہ 1525 پاکستانیوں کو یوکرین سے ہنگری، پولینڈ، رومانیہ منتقل کیا جاچکا ہے۔
مزید پڑھیں: پہلا پاکستانی طالب علم یوکرین سے وطن واپس کیسے پہنچا؟
واضح رہے کہ دو روز قبل یوکرین میں زیر تعلیم ایک پاکستانی طالبعلم مشکلوں سے جان بچاتے ہوئے وطن واپس پہنچا تھا۔
