اب تک سمجھا جاتا رہا ہے کہ خواتین مردوں کے مقابلے میں بری ڈرائیورز ہیں تاہم ایک نئی رپورٹ نے اس کی نفی کردی۔
حال ہی میں برطانوی جریدے کی جانب سے جاری کی گئی ایک رپورٹ میں کہا گیا کہ خواتین، مردوں کے مقابلے میں اچھی اور کامیاب ڈرائیور ہیں۔
رپورٹ میں کہا گیا کہ خواتین ڈرائیورز کے ساتھ سفر مردوں کے مقابلے میں زیادہ محفوظ رہتا ہے خصوصاً شاہراہوں پر خواتین زیادہ اچھی ڈرائیور ثابت ہوئی ہیں۔
رپورٹ کے مطابق مردوں کا یہ گمان سراسر غلط ہے کہ وہ خواتین کے مقابلے میں بہتر ڈرائیور ہوتے ہیں، دراصل خواتین اور مردوں کے درمیان زندگی کے مختلف شعبوں میں مسابقت کی کوئی حد نہیں ہے۔ ڈرائیونگ کا شعبہ بھی ان میں سے ایک ہے۔
مذکورہ رپورٹ میں بتایا گیا کہ اگر گاڑی خاتون چلا رہی ہیں اور آپ اس کے ساتھ سفر کر رہے ہیں تو آپ گاڑی میں سکون سے سو سکتے ہیں۔ مسافر ٹریفک حادثات کے خطرات ذہن سے کھرچ کر پھینک سکتا ہے۔
تجزیاتی رپورٹ میں یہ بھی بتایا گیا ہے کہ سنہ 2018 کے دوران 79 مرد ڈرائیورز نے ہر قسم کی ٹریفک خلاف ورزیاں بڑی تعداد میں کیں جبکہ اس حوالے سے خواتین کا تناسب 21 فیصد تک محدود رہا۔
یہ بھی کہا گیا کہ مرد ڈرائیورز نے خواتین کے مقابلے میں مقررہ رفتار سے 3 گنا زیادہ رفتار سے گاڑیاں چلائی ہیں۔
رپورٹ میں یہ بھی کہا گیا کہ دراصل خواتین کو ڈرائیونگ کے دوران راستوں کی اونچ نیچ کو جاننے، سمجھنے اور گاڑی کے الیکٹرانک آلات استعمال کرنے میں مردوں کے مقابلے میں دشواری پیش آتی ہے لہٰذا اسی تناظر میں وہ محتاط یا محفوظ ڈرائیونگ کرتی ہیں۔
