فتنہ خوارج کے چنگل سے بازیاب بچے نے خوارج کی درندگی بے نقاب کردی ہے۔
اے آر وائی نیوز کے مطابق شمالی وزیرستان میں فتنہ الخوارج کی جانب سے بچوں کے جنسی استحصال کا انکشاف ہوا ہے۔
فتنہ خوارج کے چنگل سے بازیاب بچے نے بتایا کہ والد کی وفات کے بعد خوارج ساتھ لے گئے، وہ جنسی استحصال کرتے تھے، خارجی مرکز میں بچوں سے غیر اخلاقی حرکات کرتے تھے۔
متاثرہ بچے نے بتایا کہ پاک فوج نے آپریشن کرکے بازیاب کروایا ہے۔
واضح رہے کہ آج سیکیورٹی فورسز نے شمالی وزیرستان میں دہشت گردوں کے خلاف بڑی اور مؤثر کارروائیاں کرتے ہوئے گزشتہ 72 گھنٹوں کے دوران ‘فتنہ الخوارج’ کے 4 اہم کمانڈروں سمیت مزید 21 خارجیوں کو جہنم واصل کر دیا۔
ان کامیاب کارروائیوں سے علاقے میں خوارج کے نیٹ ورک کو شدید دھچکا پہنچا ہے، حالیہ دنوں میں ہونے والے ان پے در پے آپریشنز کے نتیجے میں اب تک مجموعی طور پر 48 خارجی مارے جا چکے ہیں۔
آئی ایس پی آر کے اعلامیے میں کہا گیا کہ کارروائی میں ہلاک ہونے والے دہشت گردوں میں فتنہ الخوارج کے 4 اہم سرغنہ (کمانڈرز) بھی شامل ہیں جن کی شناخت خالد رضا عرف سالار ، مفتون ، موسیٰ اور عمران عرف ایان کے ناموں سے ہوئی۔
ہلاک خوارج سیکیورٹی فورسز اور معصوم شہریوں کے خلاف متعدد دہشت گردانہ کارروائیوں، ٹارگٹ کلنگ اور سنگین جرائم میں قانون نافذ کرنے والے اداروں کو انتہائی مطلوب تھے۔
