نئی دہلی: بھارت میں ایک نجی ہاؤسنگ سوسائٹی میں داخل ہونے والے شخص نے شناخت پوچھنے پر سیکیورٹی گارڈ پر حملہ کردیا، پولیس نے مذکورہ شخص کے خلاف مقدمہ درج کرلیا۔
بھارتی میڈیا کے مطابق واقعہ ریاست اتر پردیش کے شہر غازی آباد کی ایک ہاؤسنگ سوسائٹی میں پیش آیا۔
سی سی ٹی وی کیمرے میں ریکارڈ فوٹیج میں دیکھا جاسکتا ہے کہ ایک شخص عمارت کے دروازے سے اندر داخل ہو کر سیکیورٹی گارڈ پر تشدد شروع کردیتا ہے۔
جواب میں سیکیورٹی گارڈ بھی اسے مکے مارتا ہے اور دونوں باقاعدہ ہاتھا پائی شروع کردیتے ہیں۔
Young man thrashed security guard at the gate of Windsor Paradise Society of Raj Nagar Extension in #Ghaziabad. Incident is of October 10 and Police registered a case against the person on the complaint of the security guard. pic.twitter.com/v5hMOWDHBA
— Nikhil Choudhary (@NikhilCh_) October 15, 2022
اس دوران ایک خاتون اندر آتی ہیں اور بیچ بچاؤ کی کوشش کرواتی ہیں، اندر سے ایک اور شخص بھی نکل کر دونوں کو روکتا ہے۔
مقامی پولیس کے مطابق مذکورہ شخص اپنے خاندان کے ساتھ حال ہی میں اس عمارت میں منتقل ہوا تھا، ڈیوٹی پر موجود سیکیورٹی گارڈ اسے پہچانتا نہیں تھا۔
رات کے وقت اندر داخل ہونے پر گارڈ نے اس شخص سے اس کی شناخت پوچھی جس پر وہ آپے سے باہر ہوگیا اور گارڈ پر حملہ کردیا۔
پولیس کا کہنا ہے کہ سیکیورٹی گارڈ کی جانب سے شکایت کے بعد مقدمہ درج کرلیا گیا ہے اور مذکورہ شخص کے خلاف کارروائی کی جارہی ہے۔
