اسلام آباد : وفاقی وزیر برائے پارلیمانی امور علی محمد خان نے کہا ہے کہ حکومت ریٹائرمنٹ کی حد عمر کم کرنے یا ماہانہ پنشن ختم کرنے کے کسی منصوبے پر غور نہیں کررہی۔
یہ بات انہوں نے سینیٹ کے اجلاس میں توجہ دلاؤ نوٹس کے جواب میں کہی، چیئرمین سینیٹ صادق سنجرانی کی زیر صدارت سینیٹ کے اجلاس میں سینیٹر میر کبیر شاہی نے توجہ دلاؤ نوٹس پیش کیا ۔
جس میں کہا گیا کہ ریٹائرمنٹ کی عمر کم کرنے اور ماہانہ پنشن ختم کرنے کے مجوزہ منصوبے سے ملازمین میں ہیجان کی صورتحال پیدا ہوگئی ہے، انہوں نے کہا کہ آج سرکاری ملازمین سخت مشکلات کا شکار ہیں، حکومت ایسا کوئی بھی اقدام کرنے سے باز رہے۔
جس کے جواب میں وفاقی وزیر برائے پارلیمانی امور علی محمد خان نے کہا کہ سرکاری ملازمین کی ریٹائرمنٹ کی عمر سے متعلق صرف سوشل میڈیا پر ہی شور مچ رہا ہے۔
انہوں نے واضح طور پر کہا کہ حکومت ابھی ایسا کوئی منصوبہ نہیں لا رہی کل کا کسی کو پتہ نہیں ہوتا، علی محمد خان نے کہا کہ وزارت خزانہ نے بھی تحریری طور پر آگاہ کر دیا ہے کہ ایسی کوئی تجویز زیر غور نہیں، سوشل میڈیا پر جو بات ہوتی ہے پہلے اس کی تصدیق کرلینی چاہیے۔
