واشنگٹن: امریکا کی مقبول ترین سرکس کمپنی رنگلنگ بروز نے 150 سال بعد سرکس بند کرنے کا اعلان کردیا۔
سرکس کمپنی کے سربراہ کینتھ فیلڈ نے کہا ہے کہ سرکس میں عوام کی عدم دلچسپی، ٹکٹوں کی فروخت میں نمایاں کمی اور اخرا جات میں اضافے کے بعد ان کے اہلخانہ نے بڑی سوچ بچار کے بعد کمپنی بند کرنے کا حتمی فیصلہ کیا ہے۔
انہوں نے مزید کہا کہ رنگلنگ برادرز اور برنم اینڈ بیلی اپنا آخری شو مئی میں پیش کرے گا جس کے بعد سرکس کمپنی کو ہمیشہ کے لیے بند کردیا جائے گا۔
دوسری جانب جانوروں کے تحفظ کی تنظیم پیٹا کا کہنا ہے کہ سرکس شو میں رکھے جانے والے جانوروں نے دردناک ترین زندگی گزاری ہے۔
پیٹا کے صدر انگرڈ نیورک کا کہنا ہے کہ پیٹا نے ان جانوروں کے لیے 36 سال تک احتجاج کیا ہے اور بالآخر اس احتجاج نے دنیا کی توجہ جانوروں کی حالت زار کی متوجہ کروا دی ہے۔
پیٹا کے اہلکار اکثر و بیشتر شو کے دوران سرکس کے باہر احتجاجی مظاہرے کرتے تھے جن میں وہ پلے کارڈز کے ذریعہ ہاتھیوں اور دیگر جانوروں پر ہونے والے تشدد کے لیے آواز اٹھاتے تھے۔
واضح رہے کہ سرکس کے مخصوص کرتب دکھانے کے لیے ہاتھیوں اور جانوروں کو تشدد کے ذریعے سدھایا جاتا ہے جس کے باعث وہ اپنی فطرت کے برخلاف مختلف کرتب دکھاتے ہیں۔
