The news is by your side.

Advertisement

پیٹرول کی قیمت 25 روپے بڑھ جانا بڑا اضافہ ہے، اسد عمر کا اعتراف

اسلام آباد: وفاقی وزیر برائے منصوبہ بندی اسد عمر نے اعتراف کیا ہے کہ پیٹرول کی قیمت 25 روپے بڑھ جانا بڑا اضافہ ہے۔

اے آر وائی نیوز کی رپورٹ کے مطابق وفاقی وزیر اسد عمر نے میڈیا سے گفتگو کرتے ہوئے کہا کہ پیٹرول کی قیمت بڑھ جانا بڑا اضافہ ہے، وزارت خزانہ نے تمام محرکات کو سامنے رکھتے ہوئے فیصلہ کیا ہوگا، پیٹرولیم مصنوعات کی قیمتوں میں اضافے کے فیصلے شامل نہیں تھا۔

ان کا کہنا ہے کہ پیٹرول کی قیمت میں اضافہ اس لیے کیا گیا کہ عالمی منڈی میں غیرمعمولی تبدیلی آئی، عالمی منڈی میں تیزی سے قیمتیں نیچے اور پھر اوپر گئیں، لوگ 25 روپے اضافے کی بات کررہے ہیں 40 روپے کم کیے وہ بھی دیکھیں۔

اسد عمر نے کہا کہ آج بھی پیٹرول کی قیمت فروری کے مقابلے میں کم ہے، عوام کی تکلیف کا احساس ہے، احتجاج کرنا بھی عوام کا حق ہے، پاکستان کی تاریخ میں پہلی بار عشائیے میں نمبرز گنے جارہے تھے۔

وفاقی وزیر کے مطابق موجودہ بجٹ وزیراعظم کے الیکشن سے زیادہ اکثریت سے منظور ہوا، اپوزیشن کے تمام دعوے اور افلاطون اینکرز کے تجزیے غلط ثابت ہوئے۔

انہوں نے کہا کہ اپنی ترجیح سمجھ کر بلوچستان کی بہتری کے لیے کام کرتے رہیں گے، اتحادی جماعتوں کے لیے دروازے آج بھی کھلے ہیں، عوام کے لیے جو کام کرنا ہے اس میں کسی پارٹی کا ووٹ شرط نہیں۔

واضح رہے کہ چند روز قبل حکومت کی جانب سے یکدم پیٹرول کی قیمت میں 25 روپے اضافہ کردیا گیا تھا جس کے بعد اپوزیشن کی جانب سے حکومت پر شدید تنقید کی جارہی ہے۔

Comments

یہ بھی پڑھیں