لاہور : پولیس نے دریائے راوی پر سیر وتفریح کے لئے آنے والے شہریوں کو اغوا کرنے والے گروہ کے سرغنہ سمیت 3 اغواکاروں کو حراست میں لے لیا۔
تفصیلات کے مطابق لاہور میں دریائے راوی پر سیرو تفریح اور نہانے کے لئےآنے والےشہریوں کو اغواء کرکے تاوان وصول کرنے کا انکشاف ہوا ہے۔
لاہور پولیس نے گروہ کے سرغنہ ریاض نامی ملاح سمیت 3 اغوا کاروں کو حراست میں لے لیا، ملزمان کیخلاف مقدمہ درج کرلیا گیا، ایف آئی آر کے متن میں کہا گیا ہے کہ اغواکاروں نے مبینہ طور پر 18 سالہ نوجوان کو اغوا کرکے اہل خانہ سے تاوان مانگا تھا۔
مغوی کے والد نے پولیس کو بتایا کہ میرابیٹا 22مئیکو دوست کے ہمراہ سیر کے لئے دریائے راوی گیا تھا، دریائے راوی پر ریاض نامی ملاح نے اسے اغوا کیا اور پھر رقم کا مطالبہ کیا۔
ایف آئی آر کے مطابق مغوی والد کا کہنا ہے کہ واقعے کو ایک ماہ گزر گیا لیکن میرا بیٹا ابھی تک بازیاب نہیں ہوسکا، پولیس کے مطابق مقدمے کی تفتیش انویسٹی گیشن ونگ سے سی آئی اے کو منتقل کردی گئی ہے۔
