The news is by your side.

Advertisement

محفوظ سڑکوں کے حوالے سے سعودی عرب کا بین الاقوامی اعزاز

ریاض: سعودی عرب محفوظ سڑکوں کے حوالے سے دنیا کے ٹاپ 10 ممالک میں آگیا، مملکت میں ٹریفک حادثات کا تناسب کم ہو کر صرف 21 فیصد رہ گیا۔

سعودی ویب سائٹ کے مطابق سعودی وزارت نقل و حمل کا کہنا ہے کہ ہمارا ہدف مملکت بھر کی شاہراہوں پر ٹریفک حادثات سے اموات کو صفر تک لانا ہے۔

وزارت نقل و حمل نے سنہ 2020 کے دوران مملکت کے مختلف علاقوں میں 2 ہزار کلو میٹر سے زیادہ طویل سڑکوں کا جال بچھایا ہے اور سعودی عرب کی شاہراہیں بین الاقوامی معیار کی ہیں۔

وزارت نقل و حمل نے شاہراہوں کی اصلاح و مرمت کے بھی متعدد منصوبے نافذ کیے جن کی بدولت مملکت میں ٹریفک حادثات کا تناسب کم ہو کر 21 فیصد رہ گیا، ٹریفک حادثات کی وجہ سے شدید زخمی ہونے والوں کا تناسب 20 فیصد رہ گیا۔

وزارت نقل و حمل کا کہنا ہے کہ اس نے 4 لاکھ 27 ہزار کلو میٹر سے زیادہ کی سڑکوں پر مختلف علامات بنوائی ہیں، علاوہ ازیں اسمارٹ آلات کی مدد سے حادثات کے بارے میں انفارمیشن سسٹم قائم کیا ہے۔

نائب وزیر نقل و حمل بدر الدلمی کے مطابق وزارت نے گزشتہ عشروں کے دوران 73 ہزار کلو میٹر سے زیادہ طویل سڑکیں تیار کیں، ان میں شاہراہیں بھی شامل ہیں۔ دو رویہ سڑکیں بھی ہیں اور ون وے والے راستے بھی ہیں۔

وزارت نقل و حمل نے گزشتہ سال 2 ہزار کلو میٹر طویل سڑکوں کا بھی افتتاح کیا جس کے باعث پکی سڑکوں کی کل لمبائی 75 ہزار کلو میٹر تک پہنچ گئی ہے۔ انہوں نے بتایا کہ وزارت نے ٹرانسپورٹ کے 33 نئے منصوبے 6 علاقوں میں نافذ کروائے ہیں۔

الدلمی کا مزید کہنا تھا کہ شاہراہوں کے جال کے حوالے سے سعودی عرب نے پہلی پوزیشن حاصل کرلی ہے، دنیا بھر میں محفوظ شاہراہوں کے حوالے سے سعودی عرب ٹاپ 10 ممالک کی فہرست میں آچکا ہے۔

Comments

یہ بھی پڑھیں