کراچی:‌ پولیس وردی میں ملبوس ڈاکو 60 لاکھ روپے چھین کر فرار
The news is by your side.

Advertisement

کراچی:‌ پولیس وردی میں ملبوس ڈاکو 60 لاکھ روپے چھین کر فرار

کراچی: شہر قائد میں اسٹریٹ کرائم کا جن قابو سے باہر ہوگیا، دن دیہاڑے شہید ملت روڈ پر پولیس وردی میں ملبوس ڈاکو منی چینجر کی گاڑی سے 60 لاکھ روپے لوٹ کر فرار ہوگئے۔

تفصیلات کے مطابق کراچی کے علاقے بہادرآباد میں واقع شہید ملت روڈ پر منی چینجر کی گاڑی بینک سے رقم لے کر نکلی تو اُسے پولیس کی وردی میں ملبوس اور جدید ہتھیاروں سے لیس افراد نے روکا اور 60 لاکھ روپے کی خطیر رقم آسانی سے لوٹ کر فرار ہوگئے۔

ڈرائیور کے مطابق ڈاکو بظاہر سرکاری اہلکار معلوم ہورہے تھے کیونکہ انہوں نے پولیس جیسی ٹی شرٹ اور کیپ پہن رکھی تھی جبکہ اُن کے پاس جدید کلاشنکوفیں تھیں۔

منی چینجر کمپنی کے ملازم کا کہنا ہے کہ ہم بینک سے پیسے نکال کر دفتر کی طرف واپس جارہے تھے کہ اچانک تیز رفتار گاڑی سامنے آکر رکی اور اُس میں سے مسلح افراد نکلے جنہوں نے پہلے زدوکوب کیا اور پھر رقم لے کر چل دیے۔

دوسری جانب شہر قائد میں اسٹریٹ کرائم کی وارداتوں میں تشویشناک حد تک اضافہ ہوگیا، گلستان جوہر میں بینک کے اے ٹی ایم سے شہری رقم نکال رہا تھا کہ اسی دوران دو ڈاکوؤں نے بغیر اسلحے کے شہری کو لوٹنے کی کوشش کی اور اُس پر شدید تشدد کیا مگر اُس نے پرواہ نہیں کی اور وہ جائے واقعہ سے بھاگ نکلا ۔

علاوہ ازیں شہری کو لوٹنے کی ایک اور واردات ہوئی جس میں مسلح افراد نے بچوں کی پرواہ تک نہیں کی اور اُس سے اسلحے کے زور پر نقدی و موبائل چھین لیا۔

Comments

comments

یہ بھی پڑھیں