ڈاکوؤں نے درس گاہوں کو بھی نہ بخشا اور کراچی کے علاقے کورنگی نمبر 5 میں ایک گرلز اسکول کو تدریس کے اوقات کے دوران لوٹ لیا گیا۔
اے آر وائی نیوز کے مطابق ملک کے سب سے بڑے شہر اور معاشی حب کراچی میں عملاً ڈاکو راج قائم ہوچکا ہے اور ان کے حوصلے بلند اور ضمیر اتنے پست ہوچکے ہیں کہ اب کوئی درس گاہ بھی ان کی دست برد سے محفوظ نہیں رہی ہے۔
گزشتہ روز کراچی کے علاقے کورنگی نمبر 5 میں ڈاکو دندناتے ہوئے تدریس کے اوقات میں ایک اسکول میں داخل ہوئے۔ بے حس ڈاکو اساتذہ اور طالبات کو لوٹ کر با آسانی فرار ہوگئے جس کی سی سی ٹی وی فوٹیج اے آر وائی نیوز نے حاصل کرلی ہے۔
فوٹیج میں دیکھا جا سکتا ہے کہ مسلح ملزمان نے کلاسوں میں اساتذہ اور طلبہ دونوں کے بیگز اور جیبوں کی تلاشی لی اور 20 مہنگے موبائل فون، لیپ ٹاپ اور نقدی لوٹ کر با آسانی فرار ہوگئے۔
بے خوف ڈاکوؤں نے اسکول کے ہر آفس اور کلاس میں موجود عملے اور طالب علموں سے لوٹ مار کی۔
نذیر شاہ کراچی میں اے آر وائی نیوز سے وابستہ سینئر صحافی اور کرائم رپورٹر ہیں، وہ 14 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔