کراچی : ایف بی ایریا پولیس 20 روز قبل ہونے والی لاکھوں روپے کی ڈکیتی میں ملوث ملزمان کو تاحال گرفتار نہ کرسکی، متاثرہ شہری کو یہ رقم سندھ حکومت نے فراہم کی تھی۔
تفصیلات کے مطابق کراچی کے علاقے فیڈرل بی صنعتی ایریا میں2دسمبر کو ہونے والی 75لاکھ روپے کی ڈکیتی کی واردات معمہ بن گئی۔
اتنے دن گزرنے کے باوجود مبینہ ڈکیتی کی واردات میں ملوث ایک بھی اب تک ملزم گرفتار نہ ہوسکا، تفتیشی افسر کا کہنا ہے کہ مبینہ ڈکیتی نجی ایونٹ منیجر کے سی ای او کے ساتھ ہوئی تھی۔
پولیس کے مطابق متاثرہ شہری نے بتایا ہے کہ وہ ٹھٹھہ میں بلاول بھٹو یوتھ فٹبال چیمپئن شپ منعقد کرانے جارہا تھا، شہری کے مطابق اس کا موبائل فون، بینک کارڈ اور کمپنی کے 75لاکھ روپے کے چیکس بھی چھین لئے گئے۔
شہری نے بتایا کہ کراچی سے ٹھٹھہ جاتے ہوئے اس کی گاڑی نیو کراچی شفیق موڑ کے قریب خراب ہوئی، اس دوران 4ملزمان آئے اور انہوں نے اسلحے کے زور پر اس سے تمام سامان چھین لیا۔
ایف بی ایریا پولیس کا کہنا ہے کہ سندھ حکومت نے75لاکھ روپے کی رقم مدعی کی کمپنی کو ایک اسپورٹس ایونٹ منعقد کرنے کیلئے جاری کی تھی۔
