کیا آپ نے کبھی کسی ایسے ریستوران میں کھانا کھایا ہے جہاں کھانا سلائیڈز پر سفر کرتا ہوا آپ کے پاس آتا ہو؟ یقیناً آپ کے لیے یہ ایک حیران کن بات ہوگی۔
لیکن برطانیہ میں ایسا ہی ایک ریستوران کھولا گیا ہے جہاں کھانا 400 میٹر طویل رولر کوسٹر پر سفر کرتا ہوا لوگوں کے پاس پہنچتا ہے۔ یہ برطانیہ میں اپنی نوعیت کا پہلا ریستوران ہے۔
چھت سے لے کر زمین تک مختلف دائروں میں گھومتی رولر کوسٹر کا نظارہ اس وقت بہت دلچسپ ہوتا ہے جب ویٹرز اس کے اوپر آرڈر کیا ہوا کھانا رکھ دیتے ہیں اور اس کے بعد یہ گھومتا گھماتا، چکر کاٹتا ہوا ٹھیک اپنی مطلوبہ میز پر آکر رکتا ہے۔
کھانے کا اوپر سے نیچے آنے تک کے سفر کے دوران لوگوں کی بھوک اور بھی چمک اٹھتی ہے۔
ہوٹل کی انتظامیہ کا کہنا ہے کہ چونکہ یہ برطانیہ کا واحد ریستوران ہے جہاں اس طرح سے کھانا سرو کیا جاتا ہے لہٰذا سیاحوں اور مقامی افراد کے لیے یہ بے حد کشش کا باعث ہے اور لوگ یہاں کھانا کھانے کے لیے کھنچے چلے آرہے ہیں۔
