کراچی: سیکریٹری بلدیات روشن شیخ نے کہا کہ جانوروں کو بھی جینے کا حق دینا چاہیے، ان کے ساتھ ظلم نہیں کرنا چاہیے، آوارہ کتوں کے خلاف ترکی کی طرز کا ماڈل اپنایا جائے گا۔
تفصیلات کے مطابق اے آروائی نیوز کے پروگرام باخبرسویرا میں گفتگو کرتے ہوئے سیکریٹری بلدیات روشن شیخ نے کہا کہ کتوں کو تلف کرنے سے مسئلہ حل نہیں ہوگا، کتوں کو مارنے کے بجائے ویکسین لگانا بہتر سمجھا۔
انہوں نے کہا کہ کتوں کو ویکسین دینے سے متعلق این جی اوز کا تعاون حاصل ہے، باقاعدہ کوئی سروے نہیں ہوا، تقریباََ 12 سے 15 لاکھ کتے ہیں، کتوں کو ویکسین کے بعد ریبیز کا خطرہ نہیں رہتا۔
روشن شیخ نے کہا کہ کتوں کی ویکسین کے لیے 90 کروڑ روپے کا بجٹ رکھا جائے گا، کراچی میں اینیمل سینٹر بنا رہے ہیں، پی سی ون کی تیاری جاری ہے۔
سیکریٹری بلدیات نے کہا کہ لاڑکانہ سمیت دیگر اضلاع میں کام کیا جائے گا، آوارہ کتوں کے خلاف ترکی کی طرز کا ماڈل اپنایا جائے گا۔ انہوں نے کہا کہ جانوروں کو بھی جینے کا حق دینا چاہیے، ان کے ساتھ ظلم نہیں کرنا چاہیے۔
یاد رہے کہ گزشتہ ماہ 16 اکتوبر کو سندھ ہائی کورٹ نے کے ایم سی اور ڈی ایم سیز کو آوارہ کتے پکڑنے کا حکم دیا تھا۔
