آکلینڈ: میجر کرکٹ لیگ (ایم ایل سی) میں رومین پاول نے حارث رؤف کو لگاتار چار چھکے جڑ دیے۔
روومین پاول نے آخری اوورز میں تباہ کن بیٹنگ کا مظاہرہ کرتے ہوئے فاسٹ بولر حارث رؤف کو لگاتار چار چھکے جڑ دیے، اس شاندار کارکردگی کی بدولت لاس اینجلس نائٹ رائیڈرز نے میجر لیگ کرکٹ 2026 کے کوالیفائر 1 میں سان فرانسسکو یونیکورنز کے خلاف سنسنی خیز فتح حاصل کر کے پہلی بار فائنل کے لیے کوالیفائی کر لیا۔
ٹاس جیت کر سان فرانسسکو کے کپتان میتھیو شارٹ نے پہلے بولنگ کا فیصلہ کیا تاکہ وہ نائٹ رائیڈرز کو بیٹنگ کے لیے سازگار پچ پر کم اسکور تک محدود رکھ سکیں۔ آغاز میں یہ فیصلہ درست معلوم ہو رہا تھا لیکن پھر لاس اینجلس کے بلے بازوں نے اننگز کا اختتام انتہائی جارحانہ انداز میں کیا۔
اوپنر کولن منرو نے 44 گیندوں پر 51 رنز کی ذمہ دارانہ اننگز کھیل کر مضبوط بنیاد فراہم کی جبکہ آل راؤنڈر آندرے رسل نے بھی ایک قیمتی نصف سنچری بنا کر ٹیم کی پوزیشن مستحکم رکھی۔ تاہم یہ روومین پاول کی طوفانی اننگز تھی جس نے میچ کا پانسہ ہی پلٹ کر رکھ دیا۔
آخری اوورز میں کریز پر آنے والے ویسٹ انڈیز کے اس مایہ ناز ہٹر نے محض 15 گیندوں پر برق رفتار 50 رنز بنا ڈالے۔ انہوں نے ایسی جارحانہ بیٹنگ کی کہ سان فرانسسکو کے بولرز بے بس دکھائی دیے۔
میچ کا سب سے سنسنی خیز لمحہ 19ویں اوور میں آیا جب پاول نے حارث رؤف کو لگاتار چار فلک شگاف چھکے رسید کیے۔
اس دھواں دھار بیٹنگ کی بدولت لاس اینجلس نائٹ رائیڈرز مقررہ 20 اوورز میں 187 رنز کا بڑا مجموعہ کھڑا کرنے میں کامیاب رہی۔ پاول کے ان لگاتار چھکوں کی ویڈیوز دیکھتے ہی دیکھتے کرکٹ کے مختلف پلیٹ فارمز پر وائرل ہو گئیں۔
188 رنز کے ہدف کے تعاقب میں سان فرانسسکو یونیکورنز کے کپتان میتھیو شارٹ نے شاندار مزاحمت کی اور 62 گیندوں پر 94 رنز کی ناقابلِ شکست اننگز کھیلی۔ لیکن ان کی اس انتھک کوشش کے باوجود دوسرے اینڈ سے کسی کھلاڑی نے ان کا ساتھ نہ دیا، جس کی وجہ سے مطلوبہ رن ریٹ مسلسل بڑھتا چلا گیا۔
آخر کار سان فرانسسکو کی ٹیم 4 وکٹوں کے نقصان پر 180 رنز ہی بنا سکی اور ہدف سے محض 7 رنز پیچھے رہ گئی۔
اس تاریخی فتح نے لاس اینجلس نائٹ رائیڈرز کو پہلی مرتبہ ایم ایل سی کے فائنل میں پہنچا دیا ہے، جو اس فرنچائز کے لیے ایک سنگِ میل ہے۔
