کراچی : ٹیلی وژن کی معروف اداکارہ روبینہ اشرف کورونا وائرس سے مکمل صحت یابی کے بعد اپنے گھر منتقل ہوگئیں، ان کی صاحبزادی نے ان کے استقبال کیلئے گھر کو سجا دیا۔
تفصیلات کے مطابق ملک کی وراسٹائل اداکارہ روبینہ اشرف کورونا وائرس سے صحتیاب ہونے کے بعد گھر پہنچ گئیں، انھوں نے اس پر خوشی کا اظہار کیا روبینہ اشرف نے سماجی رابطے کی ویب سائٹ انسٹا گرام پر اپنے مداحوں سے نیک تمناؤں کا اظہار کرنے پر ان کا شکریہ ادا کیا۔
فوٹوز اینڈ ویڈیو شیئرنگ ایپ انسٹاگرام پر روبینہ اشرف کی بیٹی منا روبینہ طارق نے اپنی والدہ کے ساتھ ایک تصویر شیئر کی جس پر انہوں نے لکھا کہ یہ سب اس مسکان کے لیے جس کے بارے میں میں نے سوچا تھا کہ شاید میں اسے کبھی نہ دیکھ پاؤں اور ان ہاتھوں کے لیے جن کے بارے میں میں نے سوچا کہ میں انھیں شاید اب کبھی نہ چوم پاؤں۔
ان کا اپنے پیغام میں یہ بھی کہنا تھا کہ میری والدہ جو ایک ماہ تک کورونا وائرس سے نبرد آزما رہیں اور اس سے صحت یاب ہوکر آج دوبارہ ہمارے درمیان موجود ہیں۔
منا روبینہ اشرف کا کہنا تھا کہ میں نے روزانہ اللّٰہ تعالیٰ سے دعا کی کہ وہ مجھے میری سب سے بہترین چیز دوبارہ لوٹا دیں، اس وقت نے مجھے نہ صرف یہ سکھایا کہ میں ان کا زیادہ خیال رکھوں بلکہ اس نے مجھے یہ احساس بھی کروادیا کہ میں ان کے بغیر کچھ بھی نہیں۔
شیئر کی گئی ان تصاویر میں روبینہ اشرف اپنے گھر میں ان کے استقبال کے لیے کی گئی سجاوٹ کے پاس اپنی بیٹی کے ساتھ خوشگوار موٖڈ میں بیٹھی ہیں۔
واضح رہے کہ معروف اداکارہ روبینہ اشرف میں گزشتہ ماہ مئی کے آخر میں کورونا کی تشخیص ہوئی تھی انہوں نے بتایا تھا کہ ان کی طبیعت بہت ہی زیادہ اچھی نہیں ہے اور اس کے ایک ہفتے بعد سوشل میڈیا پر ان کی طبیعت انتہائی ناساز ہونے کی افواہیں گردش کرنے لگی تھیں۔
رواں ماہ 8 جون کو خبریں آئی تھیں کہ روبینہ اصرف کو انتہائی نگہداشت کے وارڈ (آئی سی یو) میں داخل کرادیا گیا، تاہم بعد ازاں اداکارہ کی بیٹی اور ان کے قریبی افراد نے ایسی افواہوں کو مسترد کردیا تھا۔
