ماسکو: روس کا 60 امریکی سفارتکاروں کی بے دخلی کا اعلان، روس نے سینٹ پیٹرز برگ میں امریکی قونصل خانہ بھی بند کرنے کا اعلان کردیا۔
غیر ملکی خبر رساں ادارے کے مطابق سفارت کاروں کی بے دخلی پر روس کا امریکا کو ترکی بہ ترکی جواب، روس نے 60 امریکی سفارتکاروں کی بے دخلی کا نوٹس امریکی سفیر کو طلب کرکے تھما دیا۔
روسی وزیر خارجہ سرگئی لاوروف نے کہا ہے کہ امریکی سفیر کو آج طلب کرکے نوٹس دے دیا گیا ہے اور بتایا گیا ہے کہ یہ اقدام روسی سفارتکاروں کی بے دخلی کا جواب ہے، روسی وزیر خارجہ نے امریکی سفارتکاروں کو 5 اپریل سے پہلے ملک چھوڑنے کا حکم بھی دے دیا۔
سفارت کاروں کو ملک بدر کرنے پر منہ توڑ جواب دیں گے: روسی وزارت خارجہ
چند روز قبل امریکا نے برطانیہ میں رہائش پذیر سابق روسی جاسوس اور ان کی بیٹی پر اعصابی گیس کے حملے کے ردعمل میں 60 روسی سفارتکاروں کی بے دخلی کا حکم جاری کرتے ہوئے امریکی شہر سیٹل میں واقع قونصلیٹ کو بند کرنے کا بھی اعلان کیا تھا۔
امریکا کے علاوہ کینیڈا، برطانیہ سمیت کئی یورپی ممالک نے بھی روسی سفارتکاروں کو ملک چھوڑنے کا حکم دیا تھا جس کے جواب میں روس نے بھی ہر ملک کے خلاف بھرپور کارروائی کا اعلان کیا تھا۔
اس سے قبل برطانیہ نے بھی 23 روسی سفارتکاروں کو ملک بدر کرنے کا اعلان کیا تھا جس کے جواب میں روس نے بھی برطانیہ کے اتنے ہی سفارتکاروں کی بے دخلی کا حکم جاری کیا تھا۔
