تازہ ترین

روس: ہوائی اڈے پر سونے اور چاندی کی بارش

ماسکو: روس کے مشرقی شہر کے ایئرپورٹ کے رن وے پر سونے اور چاندی کی بارش نے سب کو حیران کردیا۔

تفصیلات کے مطابق روس کے شہر یاکوتس کے ہوائی اڈے پر کارگو جہاز میں رکھی گئی بڑی تعداد میں سونے اور چاندی کی اینٹیں جہاز کے اڑان بھرتے ہی رن وے پر گر گئیں۔

غیر ملکی خبر رساں ایجنسی کے مطابق ٹیک آف کے دوران جہاز کے سامان رکھنے والے حصے کا ایک دروازہ ٹوٹ گیا جس کے باعث اس میں رکھی ہوئی سونے اور چاندی کی 200 قیمتی اینٹیں رن وے پر بکھر گئیں، ایک اینٹ کا وزن تقریباً 20 کلو بتایا گیا ہے۔

پائلٹ واقعہ سے لاعلم رہتے ہوئے اپنے مقررہ سفر کی جانب گامزن رہا جبکہ یاکوتس کے رہائشی اپنے گھروں سے باہر نکل آئے اور آسمان سے ہونے والی سونے اور چاندی کی بارش کے ثمرات کی تلاش میں مصروف ہوگئے۔

رن وے پر گرنے والی تمام سونے اور چاندی کی اینٹوں کو اکٹھا کرلیا گیا ہے، دوسری جانب پولیس نے واقعے کی وجوہات جاننے کے لیے تحقیقات کا آغاز کردیا ہے۔

یہ پڑھیں: سری لنکا میں آسمان سے درختوں کی بارش


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

- Advertisement -