واشنگٹن : نو منتخب امریکی صدر ڈو نلڈ ٹرمپ کی حلف برادری کی تقریب میں صرف دو ہفتے باقی رہ گئے ہیں اور اس سلسلے میں کیپیٹل ہل کی تزئین و آرائش کا کام بھی مکمل ہونے کو ہے۔
نو منتخب امریکی صدر ڈونلڈ ٹرمپ کی حلف برداری کی تقریب کی تیاریوں کے سلسلے میں کیپیٹل ہل کی عمارت کی تزئین و آرائش کا کام مکمل ہونے کو ہے اور منتظمین کے مطابق اس تقریب میں دس لاکھ سے زائد افراد شرکت کریں گے ۔
کیپیٹل ہل میں لوگوں کے لئے داخلی اور خارجی راستوں سمیت چیکنگ کیلئے بھی مختلف جگہیں تعمیر کی گئی ہیں۔
ڈونلڈ ٹرمپ نے بھی ان تیاریوں کے حوالے سے کچھ روز قبل کیپیٹل ہل کا دورہ کیا تھا، جہاں ہاؤس اسپیکر پال رائن نے انہیں اہم مقامات سمیت وہ جگہ بھی دکھائی، جہاں ڈونلڈ ٹرمپ امریکی صدر کی حیثیت سے حلف لیں گے۔
کیپیٹل ہل کے دورے کے موقع پر ٹرمپ کا کہنا تھا کہ صدر بننے کے بعد ان کی ترجیحات میں امیگریشن، ہیلتھ کئیراور امریکیوں کیلئے روزگار کے وسیع مواقع پیدا کرنا ہوں گے۔
ڈونلڈ ٹرمپ حلف برداری کی تقریب کے موقع پر پینسیلوینیا ایوینیو پر پریڈ ہوگی، جس کے بعد وائٹ ہاؤس کے باہر بھی ایک تقریب میں ڈونلڈ ٹرمپ کا خوش آمدید کہا جائے گا جبکہ اس موقع پر ٹرمپ کے مخالفین اور حامیوں کا مظاہرہ بھی ہوگا۔
