بیروت: لبنانی وزیر اعظم سعد الحریری نے اپنے عہدے سے مستعفی ہونے کا اعلان کردیا ۔
خبرایجنسی کے مطابق لبنان میں سعد حریری کے خلاف دو ہفتے سے مظاہرے جاری تھے اور ان میں شدت آتی جارہی تھی، مظاہرین کا مطالبہ تھا کہ وزیراعظم فوری طور پر مستعفی ہوں۔
لبنانی وزیر اعظم نے مذاکرات کی مسلسل ناکامی کے بعد مستعفی ہونے کا اعلان کیا۔ سعد الحریری کے اعلان کے بعد لبنان میں جشن منایا گیا۔
سعد الحریری نے مؤقف اختیار کیا کہ عہدے آنے جانے والی چیز ہیں، میرے لیے ملکی سالمیت اور حالات زیادہ اہم ہیں جس کی وجہ سے عہدہ چھوڑنے کا اعلان کررہا ہوں۔
یاد رہے کہ 19 اکتوبر کو سعد الحریری نے حکومتی اتحادیوں کو ہدایت کی تھی کہ وہ ملک بھر میں جاری عوامی مظاہروں کے نتیجے میں پیدا ہونے والے بحران کو حل کرنے کے لیے 72 گھنٹے میں کوئی لائحہ عمل پیش کریں۔ الحریری نے زوردیا تھا کہ معاشی اصلاحات اور سرکاری کاموں میں رکاوٹیں ڈالی جارہی ہیں جبکہ حکومت ٹیکس اہداف بڑھانے کے لیے اصلاحات لارہی ہے۔
أضع استقالتي بتصرف رئيس الجمهورية والمناصب "بتروح وبتجي والمهم كرامة وسلامة البلد” و”ما في حدا أكبر من بلدو” #لبنان_أولاً #سعد_الحريري #لبنان_ينتفض
— Saad Hariri (@saadhariri) October 29, 2019
لبنانی وزیراعظم کا کہنا تھا کہ ہم نے اخراجات کو کم کر کے آمدنی میں اضافہ کرنے کی کوشش کی مگر رکاوٹیں کھڑی کی گئیں۔ انہوں نے کہا کہ میں لبنانیوں کے درد کو محسوس کرتا ہوں اور ان کے اظہار رائے کے حق کی حمایت کرتا ہوں۔
سعد الحریری کا کہنا تھا کہ لبنان میں سیاسی کارکردگی اور ریاست کی عمل داری میں خلل پیدا ہونے پر عوام کا غصہ فطری ردعمل ہے، بہت سے لوگ مجھے قربانی کا بکرا بنانا چاہتے ہیں، میں چار سال سے حل تلاش کرنے کی کوشش کررہا ہوں مگر اس میں ناکامی رہی اور مجھے مسلسل سیاسی انتقام کا نشانہ بنایا جارہا ہے۔