The news is by your side.

Advertisement

موٹر سائیکل چھیننے کی واردات، گولیوں سے 2 افراد کے زخمی ہونے کی فوٹیجز (بچے ویڈیو نہ دیکھیں)

کراچی: شہر قائد کے علاقے گلزار ہجری میں سچل پولیس تھانے کی حدود میں گزشتہ روز موٹر سائیکل چھیننے کی ایک واردات کے دوران لٹیروں کی گولیوں سے 2 افراد زخمی ہو گئے تھے، واردات کی مختلف فوٹیجز اے آر وائی نیوز کو حاصل ہوئی ہیں۔

مختلف سی سی ٹی ٹی وی اور موبائل فوٹیجز میں اس دل دہلا دینے والی واردات کو پوری طرح دیکھا جا سکتا ہے، کس طرح لٹیروں نے شہری سے موٹر سائیکل چھیننے کے دوران اسے زخمی کیا، کیسے بھاگتے ہوئے انھوں نے ایک اور شہری کو گولی ماری، اور کس طرح وہ موٹر سائیکل چھوڑ کر بھاگے، بعد ازاں ایک ملزم کو پولیس نے گولی مار کر زخمی کیا اور پکڑ لیا۔

اے آر وائی نیوز کے مطابق گزشتہ روز سچل پولیس اسٹیشن کی حدود میں ملزمان نے موٹر سائیکل چھیننے کی واردات کی تھی، تاہم پولیس موقع پر پہنچ گئی اور مقابلے میں دو ملزمان زخمی ہوئے تاہم ایک کو گرفتار کر لیا گیا جب کہ دوسرا فرار ہونے میں کامیاب ہو گیا، ملزمان نے لوٹ مار کے دوران 2 شہریوں کو زخمی کیا تھا۔

فوٹیجز میں دیکھا جا سکتا ہے کہ ملزمان اپنی موٹر سائیکل پر آئے اور شہری کو سڑک پر روکا، وہ شہری کی ون ٹو فائیو موٹر سائیکل چھیننے کی کوشش کرتے رہے، شہری کی شدید مزاحمت پر سڑک پر ہی اسے گولی ماری گئی، جس سے وہ زخمی ہوکر گرا تو ملزمان موٹر سائیکل پر بھاگے۔

اس دوران مشتعل افراد ملزمان کے پیچھے دوڑے اور انھیں پکڑنے کی کوشش کی، لیکن فرار ہوتے ملزمان نے گولیاں چلائیں ایک اور شہری سڑک پر گرا، فوٹیج میں دوسرے زخمی شہری کو گرتے اور لنگڑا کر جاتے دیکھا جا سکتا ہے۔

تیسری ویڈیو میں ملزمان موٹر سائیکل چھوڑ کر ایک گوٹھ میں گھس گئے، موبائل ویڈیو کے مطابق پولیس اور ملزمان کے درمیان مقابلہ ہونے لگا، آخر کار پولیس نے ایک زخمی ملزم کو گرفتار کر کے اسلحہ اور موٹر سائیکل برآمد کر لی، جب کہ دوسرا زخمی ملزم فرار ہونے میں کامیاب ہوگیا۔

Comments

یہ بھی پڑھیں