لندن: برطانوی دارالحکومت کے مسلمان اور پاکستانی نژاد میئر صادق خان کو قتل کی دھمکیاں موصول ہوئیں، پولیس نے حفاظتی اقدامات کے تحت انہیں تحویل میں لے لیا۔
غیرملکی خبررساں ادارے کے مطابق یورپی یونین سے انخلا سے متعلق ریفرنڈم کے انعقاد سے میئر صادق خان کو دھمکیاں ملنے کا سلسلہ شروع ہوا، انہیں زیادہ تر دھمکیاں شدت پسند سفید فام شہریوں کی جانب سے دی جارہی ہیں۔
میئر لندن صادق خان کا کہنا ہے کہ وہ دھمکیوں سے ڈرتے نہیں اور نہ ہی انہیں نفرت کا اظہار کرنے والوں سے کسی قسم کا خوف ہے البتہ میری فیملی ضرور پریشان ہے جن کی تسلی کے لیے سیکیورٹی انتظامات یقینی بنائے جارہے ہیں۔
مزید پڑھیں: میئر لندن صادق خان نے بریگزٹ معاملے پر دوبارہ ریفرنڈم کا مطالبہ کردیا
واضح رہے کہ پولیس سے رجوع کرنے کے بعد میئر لندن کو 24 گھنٹے کے لیے حفاظتی تحویل میں لیا گیا اور ان کی سرگرمیاں محدود کردی گئیں۔
رپورٹ کے مطابق میئر لندن صادق خان کو تین ماہ کے دوران ٹیلی فون اور دیگر ذرائع سے ملنے والی دھمکیوں کی 17 شکایتیں پولیس میں درج کرائی جاچکی ہیں۔
میئر لندن کو 237 دھمکیاں سوشل میڈیا پر دی گئیں، دھمکیوں پر صادق خان کے اہل خانہ بھی پریشان ہیں جبکہ پولیس حکام نے تحقیقات کا آغاز کردیا ہے۔
