The news is by your side.

بلاول بھٹو کو جے آئی ٹی کا نوٹس ملا تو سامنا کریں گے، سعید غنی

کراچی : سندھ کے وزیر بلدیات سعید غنی نے کہا ہے کہ بلاول بھٹو کو کل تک جے آئی ٹی کی جانب سے کوئی نوٹس نہیں ملا، نوٹس ملے گا تو بھاگیں گے نہیں بلکہ جے آئی ٹی کا سامنا کریں گے۔

تفصیلات کے مطابق صوبائی وزیرِ بلدیات  سعید غنی کراچی میں میڈیا سے گفتگو کررہے تھے ۔ ان کا کہنا تھا کہ ایف آئی اے اب تک یہ پتا نہیں لگا سکی کہ فالودے والے کے اکاؤنٹ میں کس کی رقم تھی، اکاؤنٹس میں پیسے کس کے تھے یہ تو بتائیں، پیسوں کی تفصیلات نہ بتانا ایف آئی اے کی نااہلی ہے۔

ان کا کہنا تھا کہ زرداری گروپ آف کمپنیزرجسٹرڈ ہے اور گزشتہ کئی دہائیوں سے کام کررہی ہے، پیپلزپارٹی کو 20سال سے سیاسی انتقام کا نشانہ بنایا جارہا ہے، کسی نے جرم کیا ہے تو قانون کے تحت سزادیں ،ہم نے کبھی منع نہیں کیا۔

بلاول بھٹو سے متعلق ایک سوال کے جواب میں سعید غنی نے کہا کہ بلاول بھٹو کو کل تک جے آئی ٹی کی جانب سے کوئی نوٹس نہیں ملا، پی پی چیئرمین کو طلبی کا نوٹس ملے گا تو وہ اس کا سامنا کریں گے، بھاگیں گے نہیں۔

 تجاوزات کے نام پر اسکولوں کو مسمار کرنے سے متعلق ایک سوال کے جواب میں سعید غنی کا مزید کہنا تھا کہ شہر کے رہائشی علاقوں میں قانون کے مطابق اسکول چلانے کی اجازت ہے، جو کچھ ہوا وہ غلط فہمی ہوسکتی ہے۔

مزید پڑھیں: جعلی اکاؤنٹس کیس میں بلاول بھٹو جے آئی ٹی کے سامنے پیش نہیں ہوں گے

واضح رہے کہ مبینہ جعلی اکاؤنٹس کیس کی تحقیقات کے سلسلے میں پاکستان پیپلز پارٹی کے چیئرمین بلاول بھٹو جے آئی ٹی کے سامنے پیش نہیں ہوں گے۔ بلاول بھٹو کے وکیل پوچھے گئے سوالوں کا تحریری جواب داخل کرائیں گے، مشترکہ تحقیقاتی ٹیم کی جانب سے بلاول بھٹو کو سوالنامہ جاری کیا گیا ہے۔

Comments

یہ بھی پڑھیں